داوا له‌حكومه‌تی عیراق ده‌كرێت ئاوڕی جدی له‌ شه‌نگال بداته‌وه‌

ئه‌ندامیكی ئه‌نجومه‌نی نوێنه‌ران له‌پێكهاته‌ی ئێزیدی رایده‌گه‌یه‌نێت، له‌رابردوو به‌غدا كه‌مته‌رخه‌م بووه‌ له‌ ئاوه‌دانكردنه‌وه‌ی شه‌نگال و گه‌ڕانه‌وه‌ی ئێزیدیه‌كان بۆ زێدی خۆیان، كه‌ ئێستا به‌شێكی زۆریان له‌ ئاواره‌یی ده‌ژین، ئه‌و په‌رله‌مانتاره‌ داوا ده‌كات له‌گه‌ڵ ده‌ستبه‌كاربوونی كابینه‌ی داهاتووی حكومه‌ت  كاربۆ باشتركردنی ژیان و گوزه‌رانی خه‌ڵكه‌كه‌ بكات و ناوچه‌ئێزیدی نشینه‌كان دووربخاته‌وه‌ له‌ململانێی سه‌ربازی و سیاسی. 

رۆنزی زیاد ئه‌ندامی ئه‌نجومه‌نی نوێنه‌رانی عیراق به‌ PUKmedia ی راگه‌یاند: به‌هۆی هێرشه‌كانی داعش له‌ساڵی 2014به‌شێكی زۆر له‌ ناوچه‌كانی سنوری شه‌نگال  زیانیان به‌ركه‌وت و خه‌ڵكه‌كه‌ی ئاواره‌و ده‌ربه‌ده‌ر بوون، ئێستاش به‌هۆی ئاوه‌دان نه‌كردنه‌وه‌ی ئه‌و ناوچانه‌، به‌شێكی زۆری خه‌ڵكه‌كه‌ی نه‌گه‌ڕاونه‌ته‌وه‌ سه‌ر ماڵ و حاڵی خۆیان و له‌ئاواره‌یی ژیان به‌سه‌ر ده‌به‌ن.

وتیشی: دوای زیاتر له‌7 ساڵ تاكو ئێستا حكومه‌تی عیراقی وه‌كو پێویست ئاوڕی جددی له‌خه‌ڵكی شه‌نگال و زیان لێكه‌وتوانی شه‌ڕی داعش له‌سنوری پارێزگای نه‌ینه‌وا نه‌داوه‌ته‌وه‌و له‌باره‌یه‌وه‌ كه‌مته‌رخه‌م بووه‌.

ئه‌و په‌رله‌مانتاره‌ كه‌له‌ پێكهاته‌ی ئێزیدیه‌ راشیگه‌یاند: بۆئه‌وه‌ی خه‌ڵكی شه‌نگال و ده‌وروبه‌ری بگه‌ڕێنه‌وه‌ سه‌ر ماڵ و حاڵی خۆیان و كۆتایی به‌نه‌هامه‌تیه‌كانی رابردوو بهێندرێت، پێویسته‌ حكومه‌تی داهاتووی عیراق كاربۆ باشتركردنی ژیان و گوزه‌رانی خه‌ڵكه‌كه‌ بكات و ناوچه‌كه‌ دووربخاته‌وه‌ له‌ ململانێی سه‌ربازی و سیاسی.

رۆنزی زیاد داواشی له‌ كابینه‌ی داهاتوو كرد كار بۆ رزگاركردنی ئه‌و ئێزیدیانه‌ بكات كه‌ تاكو ئێستا له‌ژێر ده‌ستی داعش ماونه‌ته‌وه‌ و چاره‌نوسیان نادیاره‌، هاوكات داوای ئاوڕدانه‌وه‌ له‌وانه‌ش ده‌كات كه‌ له‌به‌نده‌ستی ئه‌و تیرۆرستانه‌ رزگاریان بووه‌و ئێستا له‌بارودۆخێكی ده‌روونی خراپدا ده‌ژین.

PUKmedia ته‌ها عه‌بدوڵڵا