پێمان نایه‌ چله‌ی زستانه‌وه‌

كورد هه‌ر له‌كۆنه‌وه‌ی خۆی بۆ چله‌ی زستان ئاماده‌كردوه‌

له‌ئه‌مڕۆوه‌ چووینه‌ ناو چله‌ی زستانه‌وه‌، ناوی خۆی به‌خۆیه‌وه‌یه‌ ماوه‌كه‌ی 40 رۆژه‌، وه‌رزی زستان 90 رۆژه‌ 25ی سه‌ره‌تا و 25ی كۆتایی، ئه‌وه‌ی له‌ ناوه‌ڕاسته‌وه‌ ده‌مێنێته‌وه‌ 40 ڕۆژه‌و و به‌ چله‌ی زستان ناوده‌برێت، مانگه‌كانی زستان بریتین له‌ به‌فرانبار، رێبه‌ندان، ره‌شه‌مێ.
چله‌ی زستان له‌ 15ی مانگی یه‌كه‌وه‌ (25 مانگی به‌فرانبار) ده‌ستپێده‌كات، واته‌ 25 رۆژ دوای هاتنی وه‌رزی زستان، كۆتاییه‌كه‌شی ده‌كه‌وێته‌ 24 ی مانگی دووه‌وه‌ (5 ی مانگی ره‌شه‌مێ) .
جگه‌ له‌ چله‌ی هاوین، له‌ كورده‌واریدا دوو جۆر چله‌ هه‌یه‌ بۆ زستان، كه‌ پێی ده‌ڵێت چله‌ی گه‌وره‌ و چله‌ی بچووك، ئه‌و جیاوازیه‌ش بۆ كه‌شوهه‌وای ناوچه‌كانی كوردستان له‌ گه‌رمیان و كوێستان ده‌گه‌ڕێته‌وه‌.
هه‌ر له‌ كۆنه‌وه‌ كورد خۆی بۆ چله‌ی زستان ئاماده‌كردوه‌، ئاڵف و تفافی بۆ ئاژه‌ڵ و خۆراكی بۆ خێزانه‌كه‌شی هه‌ڵگرتووه‌، ده‌رباره‌ی چله‌ وه‌ك وتراوه‌ (ئه‌مسه‌ری چله‌ و ئه‌وسه‌ری چله‌ تیا ده‌بارێ به‌فری زله‌، یان یه‌ك ڕۆژی بمێنی له‌ ئارا كلكی بزن ده‌كات به‌ دارا)
له‌ ڕابردوودا كورده‌واری ئه‌وه‌ی توانا و ده‌سه‌ڵاتی هه‌بوبێت، له‌م وه‌رزه‌ی زستانه‌ به‌گشتی و له‌ چله‌دا به‌تایبه‌تی بایه‌خی به‌ خواردن و شه‌وچه‌ره‌ داوه‌، به‌ تایبه‌ت مێووژ و گوێز و بادام.
قاورمه‌ی گۆشت یه‌كێك بووه‌ له‌و خواردنه‌ گرنگانه‌، خاوه‌ن ماڵ به‌رخێك یان كارێكی له‌ مه‌ڕو ماڵاته‌كه‌ی جیا ده‌كرده‌وه‌ و قه‌ڵه‌وی ده‌كرد بۆ زستان، پێیان ده‌گوت (دابه‌سته‌) به‌رده‌وام ئاڵف و ئالیكی باشی بۆ داده‌نرا، تا به‌ ته‌واوی قه‌ڵه‌و ده‌بوو، له‌م وه‌رزه‌دا سه‌ریان ده‌بڕی و هه‌موو گۆشته‌كه‌یان له‌ئێسقانه‌كه‌ی جیا ده‌كرده‌وه‌ و وردر ورد ده‌جنرا، دواتر له‌ناو مه‌نجه‌ڵێكی گه‌وره‌دا لێده‌نرا تا به‌ ته‌واوی سور ده‌بۆوه‌، دوای ئه‌وه‌ی كه‌مێك سارد ده‌بۆوه‌، ده‌كرایه‌ ناو كوپه‌ڵه‌یه‌كی شین یان سه‌وزه‌وه‌، سه‌ره‌وه‌ی به‌ ته‌واوی داده‌پۆشرا و له‌ شوێنێكی تایبه‌ت هه‌ڵده‌گیرا و ده‌پارێزرا، جگه‌ له‌ كابانی ماڵ كه‌س بۆی نه‌بوو ده‌ستكاری بكات، له‌م وه‌رزه‌دا بۆ خێزان یان میوانی خۆشه‌ویست یان ئه‌و كاته‌ی بواری چێشتلێنان نه‌بوایه‌، كه‌مێكی لێ ده‌رده‌هێنراوه‌ و گه‌رم ده‌كرایه‌وه‌و ده‌خورا، به‌ڵام به‌خوا تا نه‌یخۆیت نازانیت تامی چییه‌.

نوسینی / عه‌بدول محه‌مه‌د

PUKmedia تایبه‌ت