كەنەدا بڵاوبوونەوەی خێرای ئۆمیكرۆن رادەگەیەنێت

تەندروستی ئۆنتاریۆ ئاشكرایانكرد، بۆ یەكەم جار زیاتر لە 10 هەزار حاڵەتی نوێی توشبووی كۆڤید-19 تۆماركراوە، هاوكات بڵاوبوونەوەی خێرایی ئۆمیكرۆنی راگەیاند .

 ئۆنتاریۆ گەورەترین هەرێمی وڵاتەكەیە، ژمارەی دانیشتوانی 14 ملیۆن و 920 هەزار كەسە، بەپێی دواین راپۆرتی دەسەڵاتدارانی تەندروستی رۆژی یەك شەممە 10 هەزار و 412 حاڵەتی نوێی كۆڤید-19 تۆمار كراوە لەو ژمارەیەش  2899 حاڵەتی لە شاری تۆرۆنتۆ بووە و چوار هاووڵاتیش بەو پەتایە گیانیان لە دەستداوە .

لەكێبێك كە دووەم گەورەترین هەرێمی كەنەدایە و 8 ملیۆن و 620 هەزار كەسی تێدا دەژی، رۆژی یەك شەممە چوار هەزار و 571 حاڵەتی نوێی توشبوونی بە كۆرۆنا لە ماوەی 24 سەعاتدا راگەیاند.

هەر هەمان رۆژ وەزارەتی تەندروستی ئیتحادی لە بەیاننامەیەكدا بڵاوبوونەوەی بەرفراوانی ‎كۆڤید-19 ی بە خێرایی و بەتایبەتیش ئۆمیكرۆنی لە تەواوی كەنەدا ئاشكرا كرد كە زیاتر لە 20 هەزار و 600 حاڵەتی نوێی تووشبووی پەتاكە تۆماركراوە.

پێش گەیشتنی ڤایرۆسی ئۆمیكرۆن، رێژەی تووشبوانی ئاسایی پەتاكە لە مێژووی دوو ساڵی هەرێمی ئۆنتاریۆ 4812 حاڵەت بووە كە لە 16ی نیسانی ساڵی 2021 تۆماركراوە.

لەلایەكی ترەوە ‎ژمارەی تاقیكردنەوەكانی پشكنینی پەتا لە بنكەكانی تەندروستی ئۆنتاریۆ بەردەوامە، لە سەرەتای هەفتەوە 72 هەزار كەس پشكنینی كردووە.

لە ئەنجامی بڵاوبوونەوەی پەتای كورۆنا بەتایبەتی ئۆمیكرۆن بارودۆخی تەندروستی لە نەخۆشخانەكان بەهۆی خێرا تەشەنەكردنەوە لە خراپی دایە و لە ماوەی 24 سەعاتی رابردوودا 492 كارمەندی تەندروستی تووشی پەتاكە بوون، بەو هۆیەوە نەخۆشخانەكان كارمەندیكی زۆریان لە دەستداوە و پێویستییان بە خۆبەخشان هەیە .

دوای بڵاوكردنەوەی ئەم ژمارانە، وەزارەتی تەندروستی ئۆنتاریۆ لە ئاگادارییەكدا هانی دانیشتووانەكەی دا كە لەماوەی جەژنەكانی كریسمس و سەری ساڵ زیاتر هوشیاربن و پەیوەستبن بە رێكارە گشتییەكانی تەندروستی و خۆپارێزی.

 PUKmedia‎ عوسمان عەلی-كەنەدا
‎سەرچاوە.. سی بی سی كەنەدی