بافڵ تاڵەبانی: یەكێتی وەك هێزی رچەشكێن خۆی نوێكردوەتەوە

بافڵ تاڵەبانی ، ھاوسەرۆكی یەكێتیی نیشتمانیی كوردستان لە دەباشان پێشوازیكرد لە لیستی سەوز لە دەستەی باڵای كۆمكاری زیندانیانی سیاسی كوردستان.

لەدیدارێكدا كە شاڵاو عەلی عەسكەری، ئەندامی مەكتەبی سیاسی و شاڵاو كۆسرەت رەسوڵ، ئەندامی سەركردایەتی ئامادەیبوون، گفتوگۆ كرا لەبارەی ماف و پێداویستییەكانی زیندانیانی كوردستان، ھەمواركردنەوەی یاسای تایبەت بەژیان و گوزەرانی زیندانیان لەرێگای پێداچوونەوە بە یاسا بەركارەكان لە پەرلەمانی كوردستان.

ھاوسەرۆك بەگرنگییەوە لە رۆڵی تێكۆشەران و زیندانیانی سیاسی رووانی لە مێژووی خەباتی گەلی كورددا كە بەشدارو قوربانیدەری شۆڕش بوون و بەخۆڕاگریان بوونە داینەمۆی سەرخستنی خەبات.

گۆڕانكاری و چاكسازییەكانی پەیوەست بەحزب و سیاسەتی نوێی یەكێتی تەوەرێكی تری گفتوگۆكانی كۆبوونەوەكە بوو. بافڵ تاڵەبانی بەرچاوڕوونیدایە ئامادەبووان و ئاماژەی بۆ ھەنگاوەكانی رێكخستنەوەو بەدامەزراوەییكردنی ئۆرگانەكانی یەكێتی كرد لەسەر بنەمای پاراستنی یەیڕەوی حزبی و ژیانی رێكخراوەیی و رایگەیاند، یەكێتی وەك ھێزی رچەشكێن خۆی نوێكردوەتەوەو لەسەر بنەمای ھەڤاڵێتی ھاوبەش و یەكێتی ناو یەكێتی ئۆرگانەكانمان رێكخستەوە. بەردەوامیش دەبین لەگۆڕانكاری لەسەر بنەمای گەشەپێدان و بووژاندنەوەی یەكێتی دوور لەبەرژەوەندی شەخسی. ئێستا یەك یەكێتی ھەیە كە ئەویش یەكێتی شەھیدان، پێشمەرگە، تێكۆشەران، زیندانیانی سیاسی و كەمئەندامانی سەنگەرو كەسوكاری شەھیدانە.

PUKmedia