لیوا چەتۆ: چاوپۆشی لەهیچ كارێكی ناڕێك نەكرێت

ئەمڕۆ 16ی 8ی 2021 لیوا چەتۆ ساڵح سەعید بریكاری وەزارەتی ناوخۆ لەشاری هەولێر بەیاوەری چەند ئەفسەرێكی پلەباڵای وەزارەت هەریەك لە دادگای هێزەكانی ئاسایشی ناوخۆ/١ و دەستەی پشكنینی هێزەكانی ئاسایشی ناوخۆو بەڕێوەبەرایەتی گشتی دەستەی پشكنینی ئیدارەی وەزارەتی ناوخۆی بەسەر كردەوە.

مەبەستی بەسەركردنەوەكەی بریكاری وەزارەتی ناوخۆ بۆ لەنزیكەوە ئاگاداربونی بەڕێوەچونی كارەكانی بەڕێوەبەرایەتی ودەستەكانی وەزارەت و هەماهەنگی زیاتر و دەربڕینی پشتیوانی زیاتر سەردانیكردن.

لیوا چەتۆ  بریكاری وەزارەتی ناوخۆ لەمیانەی بەسەركردنەوە و سەردانەكەیدا وتی: دادگای هێزەكانی ئاسایشی ناوخۆ رۆڵێكی گرنگ و بەرچاوی هەبووە لەسەروەربونی یاسادا، بۆیە دەبێت لەداهاتوشدا ئەركی سەرشانیان زیاتر بەرجەستە بكەن، چونكە هێزەكانی ئاسایشی ناوخۆ كاری لەپێشینەیان دابینكردنی ئاسایش و ئارامییە بۆ هاووڵاتیان، بۆیە بەسەروەربونی زیاتری یاسا دەتوانرێ خزمەتی زیاتری هێزەكانمان بكەن و خەڵكیش لە سایەی یاسادا ژیانی پارێزراوتر بێت.

بریكاری وەزارەتی ناوخۆ دەستەی پشكنین و بەڕێوەبەرایەتی گشتی پشكنینی ئیدارەی وەزارەتی راسپارد كە زیاتر چاودێربن بەسەر بەڕێوەبەرایەتیەكانی سەر بەوەزارەتی ناوخۆوەو چاوپۆشی لەهیچ كارێكی ناڕێك و دوور لەبنەما یاساییە رێپدراوەكان نەكەن ،ئێمەش وەك وەزارەتی ناوخۆ  پشت و پشتیوانی زیاترتان دەبین.

لە بەرامبەریشدا هەریەك لە عەمیدی مافپەروەر عەبدلواحد حەسن ئیبراهیم سەرۆكی دادگای هێزەكانی ئاسایشی ناوخۆ/١ و عەمیدی مافپەروەر د.ئومێد زرار فەتحوڵڵا سەرۆكی دەستەی پشكنینی هێزەكانی ئاسایشی ناوخۆ  و نەوزاد حەمید محەمەد بەڕێوەبەری گشتی دەستەی پشكنین ئیدارەی لەوەزارەت وێڕای پێشوازییەكی گەرمیان لە لیوا چەتۆ بریكاری وەزارەتی ناوخۆ و وەفدی یاوەری خۆشحاڵی خۆیان دەربڕی بۆ سەردان و بەسەركردنەوە و شیكردنەوەی رێنماییەكانی بۆیان.

PUKmedia