عیراق.. تاقیگه‌یه‌كی پێشكه‌وتوو بۆ ئاشكراكردنی جۆره‌كانی كۆرۆنا ده‌كاته‌وه‌

وه‌زاره‌تی ته‌ندروستی و ژینگه‌ی فیدڕاڵ تاقیگه‌یه‌كی پێشكه‌وتووی بۆ ئاشكراكردنی جۆره‌ گۆڕاوه‌كانی ڤایرۆسی كۆرۆنا ده‌كاته‌وه‌.

ریاز عه‌بدولئه‌میر، به‌ڕێوه‌به‌ری گشتی له‌وه‌زاره‌تی ته‌ندروستی و ژینگه‌ی عیراق به‌ئاژانسی هه‌واڵه‌كانی عیراقی راگه‌یاند: تاقیگه‌یه‌كی پێشكه‌وتوویان بۆ شیكاری زنجیره‌ جیناته‌كانی ڤایرۆسه‌كان كرده‌وه‌و روونیشی كرده‌وه‌، گرنگی ئه‌و تاقیگه‌یه‌ له‌وه‌دایه‌ كه‌ ده‌توانێت جۆره‌ گۆڕاوه‌كانی ڤایرۆسی كۆرۆناش ده‌ستنیشان بكات.

راشیگه‌یاند: له‌تاقیگه‌كه‌دا تاقیكردنه‌وه‌ له‌سه‌ر چه‌ند نموونه‌یه‌كی ڤایرۆسه‌كان كراوه‌و له‌هه‌ندێك له‌و نموونانه‌، ده‌ستنیشانی زنجیره‌ نوێیه‌كه‌ی ده‌لتا كراوه‌.

ئاماژه‌شیدا، هه‌روه‌ها تاقیگه‌ ده‌توانرێت به‌كاربهێنرێت بۆ ده‌ستنیشانكردنی گرێ و زنجیره‌ی جیناتی زۆرێك له‌نه‌خۆشییه‌كانی شێرپه‌نجه‌و بۆماوه‌ییه‌كان، سه‌ره‌ڕای دیاریكردنی جۆری چاره‌سه‌ر بۆ ئه‌و نه‌خۆشییانه‌.

PUKmedia ئاژانسی هه‌واڵه‌كانی عیراق