شاناز ئیبراهیم ئه‌حمه‌د: ئه‌ركه‌ قورسه‌كان جێبه‌جێ ده‌كه‌ین

ئه‌مڕۆ 16ی8ی2021 شاناز ئیبراهیم ئه‌حمه‌د كارگێڕی مه‌كته‌بی سیاسی ی. ن. ك و سه‌رپه‌رشتیاری مه‌ڵبه‌ندی سلێمانی و بازنه‌ی هه‌ڵبژاردنی سلێمانی، سه‌ردانی مه‌كته‌بی رێكخراوه‌ دیموكراتییه‌كانی كردو له‌لایه‌ن فه‌همی بورهان سه‌رپه‌رشتیاری مه‌كته‌بی رێكخراوه‌ دیموكراتییه‌كان و ئه‌ندامانی مه‌كته‌ب و كادرانی مه‌كته‌به‌وه‌ پێشوازی لێكرا.

له‌ وته‌یه‌كیدا سه‌رپه‌رشتیاری مه‌ڵبه‌ندی سلێمانی باسی له‌ گرنگی و پێگه‌ی مه‌كته‌بی رێكخراوه‌ دیموكراتییه‌كان و سه‌رجه‌م رێكخراو و سه‌ندیكاكان كردو رایگه‌یاند، بۆ له‌مه‌ودوا په‌یوه‌ندییه‌كانمان باشترده‌بێت و پێكه‌وه‌ ئه‌ركه‌ قورسه‌كان جێبه‌جێ ده‌كه‌ین و بڕیاره‌ دروسته‌كان ده‌ده‌ین.

شاناز ئیبراهیم ئه‌حمه‌د وتیشی: یه‌كێتی هه‌نگاو و ڕێگه‌یه‌كی نوێی گرتۆته‌به‌ر بۆ ژیانی حزبی و سیاسی خۆی و له‌ئێستاشدا كه‌ به‌ره‌و هه‌ڵبژاردن ده‌چین، هه‌ربۆیه‌ دڵنیام كه‌ به‌رنامه‌ی مه‌كته‌به‌كه‌تان بۆ به‌ڕێوه‌چوونی بانگه‌شه‌ی هه‌ڵبژاردنه‌كان و ئه‌و هێزه‌ مرۆییه‌ی هه‌تانه‌ له‌ چوارچێوه‌ی مه‌كته‌ب و رێكخراوه‌ جیاوازه‌كاندا، ده‌بێته‌ سه‌رچاوه‌یه‌كی گرنگی بانگه‌شه‌و سه‌رخستنی لیستی هاوپه‌یمانی كوردستانی. 

دواترو پاش به‌خێرهێنانی، فه‌همی بورهان سه‌رپه‌رشتیاری مه‌كته‌بی رێكخراوه‌ دیموكراتییه‌كان رایگه‌یاند، له‌ ئێستادا ئێوه‌ وه‌كو كارگێڕی مه‌كته‌بی سیاسی و وه‌كو سه‌رپه‌رشتیاری مه‌ڵبه‌ندو بازنه‌ی هه‌ڵبژاردن له‌سلێمانی، ئه‌ركێكی قورس تان له‌سه‌ر شانه‌و ئێمه‌ش ئاماده‌ین كه‌ له‌گه‌ڵتا ئه‌و ئه‌ركه‌ قورسه‌ جێبه‌جێ بكه‌ین و شانبه‌شانی یه‌كتر یه‌كێتییه‌كه‌ی مام جه‌لال و كاندیدان و به‌رنامه‌ی لیستی هاوپه‌یمانی كوردستانی له‌ ناوچه‌ جیاوازه‌كان سه‌ر بخه‌ین و رووسورانه‌ له‌م هه‌ڵبژاردنه‌ سه‌ركه‌وتنی گه‌وره‌ تۆمار بكه‌ین. 

فه‌همی بورهان وتیشی:ئێمه‌ له‌مه‌كته‌بی رێكخراوه‌ دیموكراتییه‌كان ئومێدمان له‌سه‌ر رێكخراوه‌كان و سه‌ندیكاكان و كۆمه‌ڵه‌ جیاوازه‌كان هه‌ڵچنیوه‌و پشت و په‌نایان ده‌بین بۆ ئه‌م قۆناغه‌ی ئێستاو ئاینده‌ی كاری رێكخراوه‌یی.

PUKmedia