كاكەڕەش سدیق:كەركوكيەكان بەرانبەر گەندەڵیەكانی راكان جبوری بێدەنگ نەبن

لەكۆبونەوەیەكی میحوەری ئیمام قاسم لەبازنەی یەكی پارێزگای كەركوك كە ئەمڕۆ لەبارەگای مەكتەبی سیاسی یەكێتیی نیشتمانیی كوردستان لەشاری كەركوك بەڕێوەچوو كارنامەی میحوەرەكە بۆ تیمەكانی هاندانی سنوری میحوەرەكە لەلایەن وەستا رەسوڵ و كاكەڕەش سدیق ئەندامی سەكردایەتی یەكێتیەوە رونكرایەوە.

لەكۆبونەوەكەدا كاكەڕەش سدیق ئەندامی سەركردایەتی یەكێتی رایگەیاند: راكان جبوری پارێزگاری كەركوك بەوەكالەت بەدەستی ئەنقەست دۆخی خزمەتگوزارییەكانی لەناوچە كوردنشینەكانی كەركوك فەرامۆشكردوە.

وتیشی: راكان جبوری هەموو گرنگیەكی بەناوچە عەرەب نشینەكانی كەركوكداوەو پرۆژەكانی خزمەتگوزاریی بۆ جێبەجێكردون، بەڵام گەڕەكە كوردنشینەكانی لەڕووی خزمەتگوزاریەوە هەڵكەندوەو پرۆژەكانی بۆ تەواونەكردون.

ئەوەشی خستەڕوو: لەڕابردوودا پەرلەمانتارانی كەركوك سكاڵای یاساییان لەدژی گەندەڵیەكانی راكان جبوری تۆمار كردوە، بۆیە جبوری هەوڵیداوە تۆڵەی ئەوەش لەخەڵكی كەركوك بكاتەوە.

كاكەڕەش سدیق راشیگەیاند: لەبەرامبەر ئەو سەرپێچییانەی راكان جبوری دەیكات وەك یەكێتی هۆشداریمان پێداوەو پێمانڕاگەیاندوە بەردەوامیدان بەپشتگوێخستنی ناوچە كوردنشینەكان قابیلی قبوڵكردن نییە.

باسی لەوەشكرد: پێویستە خەڵكی كەركوك لەبەرانبەر گەندەڵیەكانی ئیدارەی كەركوك بێدەنگ رانەوەستن و دۆخەكە دەخوازێت خەڵكی كەركوك بەشداری هەڵبژاردنەكەی 10ی 10ی 2021 بكەن و كاریش بۆ سەرخستنی لیستی هاوپەیمانی كوردستان و كاندیداكانی ئەو لیستە لەپارێزگای كەركوك بكەن.

PUKmedia محەمەد ئەحمەد – كەركوك