سەرۆكی پەرلەمان:دەبێت دەستوور ماف و ئازادییەكانی هاووڵاتیانی تێدا جێگیربێت

سەرۆكی پەرلەمان پێشوازیی لە بەرپرسی نوێنەرایەتیی باڵیۆزخانەی كەنەدا لە هەولێر كرد

ئەمڕۆ د.ڕێواز فایق، سەرۆكی پەرلەمانی كوردستان، پێشوازیی لە ئاشڵی دۆرێك، بەرپرسی نوێنەرایەتیی باڵیۆزخانەی كەنەدا لە هەولێر كرد.

لە دیدارێكدا سەرۆكی پەرلەمان باسی لە كارو ئەركی پەرلەمان لە چاودێریكردن و دەركردنی یاساو هەنگاوەكانی نوسینەوەی رەشنوسی دەستووری هەرێمی كوردستان كردو ئاماژەی بەگرنگیی دەرچواندنی ئەو یاسایانە كرد كە دەبنە مایەی بەهێزكردنی سێكتەرەكانی پیشەسازی، كشتوكاڵ، گەشتوگوزار، بازرگانی و كەمكردنەوەی پشتبەستن تەنها بەكەرتی نەوت وەك تاكە سەرچاوەی داهات.

سەبارەت بەپرسی نوسینەوەی رەشنوسی دەستووریش، سەرۆكی پەرلەمان رایگەیاند:هەنگاوەكان بۆ نوسینەوەی رەشنوسی دەستووری هەرێمی كوردستان دەستیان پێكردووەو دەمانەوێت زەمینەیەكی لەبار بۆ نووسینەوەی دەستورێكی گەلپەسەند بڕەخسێنین، كە كۆدەنگیی نیشتمانیی لەسەر بێت و لەگەڵ هەلومەرجی ناوخۆ و عیراق و ناوچەكە گونجاو بێت، بە جۆرێك كە خواستەكانی هاووڵاتییانی كوردستان و تەواوی ماف و ئازادییەكانی تێدا جێگیر بكرێت.

لای خۆیانەوە بەرپرسی نوێنەرایەتیی باڵیۆزخانەی كەنەدا لە هەولێر، سوپاسی سەرۆكی پەرلەمانی كرد بۆ ئەو پێشوازییە گەرمە و هیوای سەركەوتنی بۆ خواست لەڕاپەڕاندنی ئەركەكانیدا.

PUKmedia