سه‌رۆك كۆمار: په‌یوه‌ندییه‌كانی نێوان عیراق و ئیستۆانیا پته‌وتر بكرێن

د. به‌رھه‌م ساڵح سه‌رۆك كۆماری عیراق ئه‌مڕۆ دووشه‌ممه‌ 16ی ئابی 2021 له‌ كۆشكی سه‌لام له‌ به‌غدا پێشوازیكرد له‌ كال لنێت، وه‌زیری به‌رگری ئیستۆانیا.

له‌و دیداره‌دا گفتوگۆكرا له‌باره‌ی په‌یوه‌ندییه‌كانی نێوان هه‌ردوو وڵات و رێگاكانی په‌ره‌پێدانی په‌یوه‌ندییه‌كان و گرنگی پته‌وكردنی ھاوكاری له‌بواره‌كانی ئاسایش و به‌رگری و به‌ھێزكردنی ھه‌ماھه‌نگی بازرگانی و ئابووری و رۆشنبیری، به‌جۆرێك خزمه‌ت به‌ به‌رژه‌وه‌ندییه‌ هاوبه‌شه‌كانی ھه‌ردوو گه‌لی دۆست بكات.
له‌ به‌شێكی دیكه‌ی دیداره‌كه‌دا د. به‌رهه‌م جه‌ختیكرده‌وه‌ كه‌ عێراق به‌گرنگییه‌وه‌ ده‌روانێته‌ به‌ھێزكردنی په‌یوه‌ندییه‌ سیاسی و ئابووری و بازرگانییه‌كانی له‌گه‌ڵ وڵاتان، ھاوكات دووپاتیكرده‌وه‌ له‌گرنگی چڕكردنه‌وه‌ی ھه‌ماھه‌نگی نێوده‌وڵه‌تی و هه‌رێمایه‌تی بۆ به‌ره‌نگاربوونه‌وه‌ی ئاسته‌نگه‌ جیهانییه‌ جیاوازه‌كان، به‌تایبه‌تی ریشه‌كێشكردنی تیرۆر و توندڕه‌وی و كه‌مكردنه‌وه‌ی بارگرژییه‌كان و ھێنانه‌دی ئاشتی و ئاسایش له‌ ناوچه‌كه‌دا.

PUKmedia