لەهەولێر ئۆتۆمبێلێكی رفاندو پۆلیسی سلێمانی دەستگیریكرد

كەسێك لەهەولێر ئۆتۆمبێلێكی رفاندو لەلایەن مەفرەزەیەكی پۆلیسی شارەزوورەوە تۆمەتبارەكە  دۆزرایەوەو دەستیشگیرا بەسەر ئەو ئۆتۆمبێلەدا كە تۆمەتبار رفاندبووی.

بەڕێوەبەرایەتی پۆلیسی سلێمانی لە راگەیەنراوێكیدا كە وێنەیەكی گەیشتوەتە PUKmedia رایگەیاند: دوای ئەوەی لەلایەن بەڕێوەبەرایەتی پۆلیسی هەولێر - بنكەی پۆلیسی ئیسكان زانیاری گەیشتە پۆلیسی سلێمانی كەتۆمەتبارێك بەرەو شاری سلێمانی هەڵاتووە، پۆلیسی سلێمانی لێكۆڵینەوەكانی دەستپێكردو سەرجەم بەش و بنكەكانی سنوری بەڕێوەبەرایەتی ئاگاداركردەوە كە بەدواچوونی تەواو بكەن بۆ دۆزینەوەو دەستگیركردنی تۆمەتبار.

رونیشیكردوەتەوە: سەرەنجام توانرا لەلایەن بەشی پۆلیسی شارەزوور - بنكەی پۆلیسی شارەزوورەوە تۆمەتبار بدۆزرێتەوەو دەستگیربكرێت و دەستیشبگیرێت بەسەر ئەو ئۆتۆمبێلەدا كە تۆمەتبار رفاندبووی .

پۆلیسی سلێمانی دەشڵێت: لەئێستادا تۆمەتبار (م.م.غ) بەبڕیاری دادوەر راگیراوەو دوای تەواوكردنی رێكارە یاساییەكان رەوانەی پۆلیسی هەولێر دەكرێتەوە .
PUKmedia