گه‌رمیان.. دوو تۆمه‌تبار ده‌ستگیر ده‌كرێن

به‌ڕێوه‌به‌رایه‌تی ئاسایشی گه‌رمیان له‌ڕاگه‌یه‌نراوێكدا كه‌ وێنه‌یه‌كی بۆ PUKmedia نێردراوه‌ ڕایگه‌یاندووه‌ كه‌ هێزه‌كانیان دوو تۆمه‌تباریان به‌ تۆمه‌تی دزی ده‌ستگیر كردووه‌.
 ئه‌مه‌ش ده‌قی ڕاگه‌یه‌نراوه‌كه

بۆ/كه‌ناڵه‌كانی ڕاگه‌یاندن
هێزه‌كانی به‌رێوه‌به‌رایه‌تی ئاسایشی گه‌رمیان (2)دوو تۆمه‌تباریان ده‌ستگیركرد
پاش ئه‌وه‌ی هاوڵاتیه‌ك به‌ ناوی (دڵشاد ڕه‌شید حه‌مه‌ لا ) دانیشتوی كفری پیشه‌ی كاسب له‌ ڕۆژی 14/8/2021 ئاگاداری هێزه‌كانی یاریده‌رێتی ئاسایشی كفری سه‌ر به‌ به‌رێوه‌به‌رایه‌تی ئاسایشی گه‌رمیان كرده‌وه‌ كه‌ شه‌وی 13_14/8/2021 له‌لایه‌ن كه‌سانی نه‌ناسراوه‌وه‌ دوكانه‌كه‌ی كه‌ كه‌ره‌سته‌ی بیناسازی تێدا بووه‌ بڕدراوه‌ و هه‌ندێك كه‌لوپه‌لی بیناسازی له‌ ناو دوكانه‌كه‌ی دزراوه‌ ، ده‌ستبه‌جێ هێزه‌كانی یارده‌ده‌رێتی ئاسایشی كفری ده‌ستیان به‌ لێكۆڵینه‌وه‌ی ورد و كۆكردنه‌وه‌ی زانیاری كرد و به‌ پشتبه‌ستن به‌ كامێراكانی چاودێری هه‌مان كات توانییان له‌ سه‌ر فه‌رمانی به‌رێز دادوه‌ری لێكۆڵینه‌وه‌ به‌پێی ماده‌ی (443)دووتۆمه‌تبار به‌ناوه‌كانی (ز ن ق له‌ دایكبوی 2003 كه‌پێشینه‌ی تاوانی هه‌یه‌ و ش ع ع له‌ دایكبوی 1999)ده‌ستگیر بكرێن و له‌ كاتی لێكۆڵینه‌وه‌دا هه‌ردوو تۆمه‌تباری ناوبراو دانیان به‌ تاوانه‌كه‌یاندا ناوه‌و لێكۆڵینه‌وه‌ش به‌رده‌وامه‌ .
هاوكات له‌ لایه‌كی تره‌وه‌ شه‌وی 13_14/8/2021 پاش ده‌ست كه‌وتنی زانیاری سه‌باره‌ت به‌ ئۆتۆمبیلێك له‌ ده‌شتایه‌كانی سنوری سه‌رقڵا ده‌ست به‌ جێ مه‌فره‌زه‌یه‌كی هاوبه‌ش له‌ هێزه‌كانی پێشمه‌رگه‌و پۆلیسی دارستان و یاریده‌ده‌رێتی ئاسایشی خورماتوو سه‌ر به‌ به‌ڕێوه‌به‌رایه‌تی ئاسایشی گه‌رمیان بۆ لێكۆڵینه‌وه‌ له‌ ئۆتۆمبیله‌كه‌ ڕۆشتنه‌ شوێنی مه‌به‌ست به‌ڵام ئۆتۆمبیله‌كه‌ هه‌ڵهاتووه‌ و له‌ سنوری گوندی قه‌واڵی توانرا ده‌ست به‌سه‌ر ئۆتۆمبیله‌كه‌دا بگیرێت و تۆمه‌تبارانی ناو ئۆتۆمبیله‌كه‌ بۆ جێگایه‌كی نادیار هه‌ڵهاتوون ، پاش پشكنینی ئۆتۆمبیله‌كه‌ كه‌ جۆری پاترۆڵ بووه‌ كۆمه‌ڵێك كه‌ره‌سته‌ی ڕاوكردنی تێدابوو ، دواتر ئۆتۆمبیله‌كه‌ ڕاده‌ستی ناحیه‌ی زنانه‌ كرا و لێكۆڵینه‌وه‌ش به‌رده‌وامه‌. 

  ڕاگه‌یاندن و په‌یوه‌ندییه‌كان 
 به‌رێوه‌به‌رایه‌تی ئاسایشی گه‌رمیان

PUKmedia زمناكۆ یه‌حیایی