وه‌زاره‌تی ده‌ره‌وه‌ 690 كۆچبه‌ر بۆ عیراق ده‌گه‌ڕێنێته‌وه‌

وه‌زاره‌تی ده‌ره‌وه‌ی عیراق ئاشكرایكرد، له‌گه‌ڵ یه‌كێتیی ئه‌وروپادا هه‌ماهه‌نگی ده‌كه‌ن به‌مه‌به‌ستی راگرتنی دیارده‌ی بازرگانی و قاچاخچێتیكردن به‌مرۆڤ و راشیگه‌یاند، 690 كۆچبه‌ریان گه‌ڕاندوه‌ته‌وه‌ كه‌له‌سنووره‌كانی نێوان بیلاڕوسیاو لیتوانیاو پۆڵه‌ندا و لاتفیا گیریان خواردبوو.

ئه‌حمه‌د سه‌حاف، وته‌بێژی وه‌زاره‌تی ده‌ره‌وه‌ له‌میانی لێدوانێكدا له‌گه‌ڵ  PUKmedia  رایگه‌یاند: هێڵی ئاسمانی عیراقیی له‌ڕێگه‌ی دوو گه‌شتی ئاسمانییه‌وه‌ 690 كۆچبه‌ری عیراقیی گه‌ڕانده‌وه‌و پێشتریش  كۆمپانیای فلای به‌غدا، له‌ڕێگه‌ی دوو گه‌شته‌وه‌ 320 كۆچبه‌ری تری گه‌ڕاندبوه‌وه‌.
راشیگه‌یاند: له‌ئێستادا وه‌زاره‌ت كار بۆئه‌وه‌ ده‌كات زۆرترین كۆچبه‌ر بگه‌ڕێنێته‌وه‌ كه‌ له‌سه‌ر سنووره‌كانی ئه‌و وڵاتانه‌ گیریان خواردووه‌، روونیشی كرده‌وه‌، ئه‌و كۆچبه‌ره‌ گیرخواردووانه‌ به‌سه‌ر چه‌ند شوێن و جێگه‌یه‌كدا دابه‌ش  و بڵاوبوونه‌ته‌وه‌ كه‌جیاوازن و له‌یه‌كترییه‌وه‌ دوورن، وه‌زاره‌ت و لایه‌نه‌كانی پاڵپشت له‌هه‌وڵی ئه‌وه‌دان ئه‌و كۆچبه‌رانه‌ رازی بكه‌ن و وایان لێبكات ئاره‌زوومه‌ندانه‌ بگه‌ڕێنه‌وه‌ بۆ خاكی نیشتمان.

سه‌حاف روونیشی كرده‌وه‌، وه‌زاره‌ت بیتاقه‌ی گه‌ڕاندنه‌وه‌ی بۆ ئه‌و كۆچبه‌رانه‌ دابینكردووه‌ كه‌ پاره‌یان پێنییه‌.

ئاماژه‌ی به‌وه‌شدا،كۆمه‌ڵگه‌ی نێوده‌وڵه‌تی له‌سه‌ر ئه‌م پرسه‌ هاوكاری خۆی ده‌ربڕیوه‌و له‌سه‌ر ئاستی باڵاش، له‌گه‌ڵ وه‌زیرانی ده‌ره‌وه‌ی لیتوانیاو بیلاڕوسیاو لاتفیا و پۆڵه‌ندا هاریكاری دروستكردووه‌له‌پێناو راگرتنی دیارده‌ی بازرگانیكردن به‌مرۆڤ و كه‌وتنه‌ داوی هاووڵاتیان له‌ناو تۆڕی ئه‌و باندو گرووپانه‌وه‌ كه‌ قاچاخچێتی به‌هاووڵاتیانه‌وه‌ ده‌كه‌ن و ده‌یانه‌وێت به‌ڕێگه‌ی نایاسایی كۆچ به‌هاووڵاتیان بكه‌ن، بۆیه‌ هه‌موو ئه‌وانه‌ی ئه‌م رێگایانه‌ ده‌گرنه‌به‌ر رووبه‌ڕووی لێپرسینه‌وه‌ی یاسایی و ئه‌منیی ده‌بنه‌وه‌.

ئاماژه‌شیدا، ئه‌م دۆسیه‌یه‌ له‌لایه‌ن جۆزیف بۆریل، لێپرسراوی باڵای سیاسه‌تی ده‌ره‌وه‌و ئاسایشی یه‌كێتی ئه‌وروپاوه‌ به‌دواداچوونی بۆ ده‌كرێت و ئه‌وه‌ش له‌ڕێگه‌ی ئه‌و په‌یوه‌ندییانه‌وه‌ كه‌ خودی فوئاد حسێن، وه‌زیری ده‌ره‌وه‌ی فیدڕاڵ له‌سه‌ر ئه‌م پرسه‌ ئه‌نجامیداون.

سه‌حاف وتیشی: له‌ئێستادا له‌ڕێگه‌ی لیژنه‌ دیپلۆماسییه‌كانه‌وه‌ به‌دواداچوون بۆ دۆخی ئه‌و كۆچبه‌رانه‌ ده‌كرێت كه‌ له‌سه‌ر سنووره‌كانی نێوان بیلاڕوسیاو لیتوانیا گیریان خواردووه‌، په‌یوه‌ندیشیان له‌گه‌ڵ ئه‌و كۆچبه‌رانه‌دا هه‌یه‌و به‌جددیش باسی ئه‌وه‌یان له‌گه‌ڵدا كردوون كه‌ ئاره‌زوومه‌ندانه‌ بگه‌ڕێنه‌وه‌ بۆ وڵات.

PUKmedia  تایبه‌ت