سەرۆك كۆمار: خەڵك هەڵبژاردنی دوور لەفشارو ساختەكاری دەوێت

سەرۆك كۆمار رایگەیاند: پێویستە ژینگەیەكی لەبار بێتەكایەوە بە ئاڕاستەی ھێنانەدی خواستی راستەقینەی خەڵك لە هەڵبژاردنەكانی داھاتوو دوور لە ساختەكاری

د. بەرهەم ساڵح سەرۆك كۆماری عیراق ئەمڕۆ 15ی 8ی 2021 لە كۆشكی سەلام لە بەغدا پێشوازیكرد لە جێنین هێنیس بلاستخارت، نوێنەری تایبەتی سكرتێری گشتی نەتەوە یەكگرتووەكان لە عیراق.
لەو دیدارەدا گفتوگۆكرا لەبارەی دۆخی سیاسی و ئەمنی وڵات و پێویستی خستنەگەری هەوڵەكان لەپێناو چەسپاندنی سەقامگیری وڵات و پاراستنی ئاسایشی هاووڵاتیان.

لە دیدارەكەدا جەختكرایەوە لە پێویستی گرتنەبەری گشت رێوشوێنەكان بۆ ئەنجامدانی هەڵبژاردنەكانی داهاتوو لە تشرینی یەكەم لەسەر بنەمای دادپەروەری لە قۆناغە جیاجیاكاندا، تاوەكو ئەنجامەكەی جێگای متمانە خەڵكی عیراق بێت.

هاوكات دووپاتكرایەوە لەهێنانەدی خواستی راستەقینەی خەڵك لە هەڵبژاردنی نوێنەرەكانیان دوور لە فشارو ساختەكاری و فرتوفێڵ، بۆ ئەو مەبەستەش رۆڵی چاودێرانی نەتەوە یەكگرتووەكان بەگرنگ زانرا.

PUKmedia