سه‌رۆك كۆمار: مه‌سیحییه‌كان به‌شدارن له‌بونیادنانی كۆمه‌ڵگه‌كه‌مان

سه‌رۆك كۆماری عیراق رایگه‌یاند، مه‌سیحییه‌كانی عیراق و مه‌سیحییه‌كانی رۆژھه‌ڵات پێكهاته‌یه‌كی ره‌سه‌نن و به‌شداری كاریگه‌ر و گرنگییان ھه‌یه‌ له‌ بونیاتنانی كۆمه‌ڵگه‌كانی ناوچه‌كه‌دا.

د.به‌رهه‌م ساڵح سه‌رۆك كۆماری عیراق ئه‌مڕۆ شه‌ممه‌ 14 ی ئابی 2021 له‌ كۆشكی سه‌لام له‌ به‌غدا پێشوازیكرد له‌ كاردیناڵ مار لویس رافائێل یه‌كه‌م ساكۆ، پاتریاركی كلدانی عیراق و جیهان و ژماره‌یه‌ك له‌ قه‌شه‌ی كه‌نیسه‌كانی كلدانی له‌ عیراق و جیھان.

له‌ دیداره‌كه‌دا سه‌رۆك به‌رهه‌م جه‌ختیكرده‌وه‌، كه‌ مه‌سیحییه‌كانی عیراق و مه‌سیحییه‌كانی رۆژھه‌ڵات پێكهاته‌یه‌كی گرنگ و ره‌سه‌نن له‌ ناوچه‌كه‌داو شانبه‌شانی براكانیان له‌ ھه‌موو پێكھاته‌كانی دیكه‌ رووبه‌ڕووی ئاسته‌نگ و ئاڵنگارییه‌ جۆراوجۆره‌كان بوونه‌ته‌وه‌، ھاوكات دووپاتیكرده‌وه‌ كه‌ رۆڵی مه‌سیحییه‌كان مێژوویی و كاریگه‌ر و گرنگ و ره‌گی قووڵی ھه‌یه‌ و توانیویانه‌ به‌شداربن له‌ بونیادنانی كۆمه‌ڵگه‌كانمان، له‌ھه‌مان كاتدا نه‌ریت و به‌های ره‌سه‌نی به‌رھه‌م ھێناوه‌، بۆیه‌ به‌ بێ مه‌سیحییه‌كان ناتوانین وێنه‌ی رۆژھه‌ڵات بكه‌ین.

ھه‌ر له‌ دیداره‌كه‌دا سه‌رۆك كۆمار به‌گرنگییه‌وه‌ باسی له‌ سه‌ردانه‌ مێژووییه‌كه‌ی پاپا فرانسیس كرد بۆ عیراق، كه‌ گوزارشت و په‌یامی هاوهه‌ڵوێستی مرۆڤایه‌تی قووڵی ھه‌بوو بۆ عیراق، كه‌ بۆ چه‌ندین ده‌یه‌ به‌ده‌ست توندوتیژی و ململانێ كه‌ڵه‌كه‌بووه‌كان ناڵاندوویه‌تی و ئێستاش چاوی له‌وه‌یه‌ به‌ئاڕاسته‌ی چه‌سپاندنی ئاسایش و سه‌قامگیری و ئارامی و پاراستنی پێكه‌وه‌ژیانی ئاشتیانه‌ و پێكهاته‌ هه‌مه‌جۆره‌كانی ھه‌نگاو بنێت.

له‌لای خۆشییه‌وه‌ كاردیناڵ مار لویس ساكۆ سوپاس و پێزانینی قووڵی خۆی بۆ سه‌رۆك كۆمار ده‌ربڕی بۆ پشتیوانییه‌ به‌رده‌وامه‌كانی له‌ مه‌سیحییه‌كانی وڵات، ھه‌روه‌ھا ھه‌وڵه‌كانی سه‌رۆك به‌رھه‌می له‌ چاره‌سه‌ركردنی زۆرێك له‌و كێشه‌ و گرفتانه‌ی كه‌ رووبه‌ڕووی مه‌سیحییه‌كان بووه‌ته‌وه‌ و رۆڵی گرنگی له‌چه‌سپاندنی پێكه‌وه‌ژیانی ئاشتیانه‌ له‌نێوان سه‌رجه‌م پێكهاته‌كانی عێراق به‌رزنرخاند.
PUKmedia ڕاگەیاندنی سەرۆکایەتی کۆمار