به‌وێنه‌..چایخانه‌كه‌ی ده‌روێش عه‌فان له‌ بیاره‌

له‌شارۆچكه‌ی بیاره‌ی  ناوچه‌ی هه‌ورامان، له‌سه‌ر سنور عێراق-ئێران ، ده‌روێش عه‌فان ماوه‌ی چه‌ند مانگێكه‌ چایخانه‌یه‌كی داناوه‌، ڕۆژانه‌ش ژماره‌یه‌كی زۆر گه‌شتیار بۆ بینی سروشتی ناوچه‌كه‌ وهه‌روه‌ها خواردنه‌وه‌ی چایه‌ك به‌ده‌ست ده‌روێش عه‌فان سه‌ردانی ئه‌و شوێنه‌ ده‌كه‌ن.

ڕۆژانی هه‌ینیش هه‌ر له‌به‌یانیه‌وه‌ تاوه‌كو ئێواره‌ ئه‌و شوێنه‌ كه‌ به‌جۆگه‌یه‌ك سنوری عێراق-ئێران جیا ده‌كرێته‌وه‌ ژماره‌یه‌كی زۆر هاوڵاتی و گه‌شتیار روو له‌و شوێنه‌ ده‌كه‌ن.

گه‌شتیاران له‌ ناوچه‌كانی تری كوردستان و ته‌نانه‌ت خواروناوه‌ڕاستی عێراق سه‌ردانی ئه‌و ناوچه‌یه‌ ده‌كه‌ن.

ده‌روێش عه‌فان بۆ PUKmedia وتی: له‌ دووه‌م ڕۆژی جه‌ژنی ڕه‌مه‌زانی پیرۆزه‌وه‌ ئه‌م چایخانه‌یه‌م له‌م ناوچه‌یه‌ كردوه‌ته‌وه‌. كه‌ به‌جۆگه‌یه‌ك سنوری عێراق-ئێران جیاده‌كرێته‌وه‌، كه‌ ئه‌وه‌ش سه‌رنجی هاوڵاتیان و گه‌شتیارانی به‌لای خۆیدا ڕاكێشاوه‌.

وتیشی: له‌م شوێنه‌ كه‌ هاوسنوره‌ له‌گه‌ڵ كۆماری ئیسلامی ئێران هاوڵاتیانی ئێرانیش بۆ خواردنی چا سه‌ردانم ده‌كه‌ن، ئه‌وان پاره‌ی ئێرانی ده‌ده‌ن، بۆیه‌ منیش بۆ هاوڵاتیان ئێرانی پاره‌ی ئێرانی وه‌رده‌گرم و بۆ عێراقیش پاره‌ی عێراقی وه‌رده‌گرم.

ده‌روێش عه‌فان ئه‌وه‌شی وت: ڕۆژانی هه‌ینی زیاتر گه‌شتیارانێكی زۆر سه‌ردانم ده‌كه‌ن و وێنه‌م له‌گه‌ڵ ده‌گرن و چایه‌ك ده‌خۆنه‌وه‌، ئه‌وه‌ش وای كردووه‌ كه‌ من به‌دڵسۆزیه‌وه‌ كاره‌كه‌م بكه‌م.

ناوچه‌ی هه‌ورامان به‌هۆی هاوسنوری له‌گه‌ڵ كۆماری ئیسلامی ئێران و  هه‌ڵكه‌وته‌ی جوگرافیاكه‌ی و فێنكی ئاوهه‌واكه‌ی وای كردووه‌ گه‌شتیارانێكی زۆر به‌لای خۆیدا ڕابكێشێت.
PUKmedia جه‌مال سه‌رگه‌تی
فۆتۆ/ شاد ئیبراهیم