تەندروستی سلێمانی داوای داخستنی بەشێك لە شوێنە گشتییەكان دەكات

بەڕێوەبەری تەندروستی سلێمانی داوا دەكات كە هەندێك لە شوێنە گشتییەكان دابخرێن.

لەچاوپێكەوتنێكیدا لەگەڵ كەنالی ئاسمانی كوردسات، د. سەباح هەورامی بەڕێوەبەری گشتی تەندروستی سلێمانی ڕایگەیاند: گەیشتووینەتە ئاستێك كە پێویستە بەشێك لە شوێنە گشتییەكان دابخرێن و پلانمان هەیە بۆ جێبەجێكردنی ڕێكارەكانی خۆپارێزی لەناو خوێندنگاكاندا. 

ڕاشیگەیاند: هەروەها پلانمان هەیە بۆ پێدانی ڤاكسین بۆ مامۆستایان و ئەو خوێندكارانەی كە تەمەنیان لەسەرووی 15 ساڵەوەیە.

بەڕێوەبەری تەندروستی سلێمانی وتیشی: هیچ ئەگەرێك لە ئارادا نییە كە ئەمساڵ دەرگای خوێندنگاكان دابخرێن. 

وتیشی: ئەو نەخۆشخانانەی هەمانە گونجاو نین لە ئێستادا بكرێن بە نەخۆشخانەی تایبەت بە كۆرۆنا و ئەو ڤاكسینانەی لە عیراق و هەرێم هەن پەسەندكراوەی ڕێكخراوی تەندروستی جیهانین.

ئاماژەی بەوەشكرد ئەو كەسانەی ڤاكسین وەردەگرن لە ئەگەری تووشبونیان بە كۆرۆنا نیشانەكانی پەتاكە لەسەریان سووك دەبێت و لە نەخۆشخانەكانی تایبەت بەكۆرۆنا كێشەمان لەبەشی چاودێری چڕ هەیە.

PUKmedia  تایبەت