شاناز ئیبراهیم ئه‌حمه‌د: بێدرێغی پاڵپشتی ئێزیدییه‌كان ده‌بین

شاناز ئیبراهیم ئه‌حمه‌د له‌ساڵیادی كاره‌ساتی شه‌نگال دا راگه‌یه‌نراێوك بڵاوده‌كاته‌وه‌و ئاماژه‌ بۆ ئه‌وه‌شده‌كات، جێگای داخ و شه‌رمه‌ هێشتا ئاسه‌واره‌كانی ئه‌و كاره‌ساته‌ كاولكارییه‌ به‌ شه‌نگالی ئازیزه‌وه‌ دیاره‌.

ده‌قی راگه‌یه‌نراوه‌كه‌...
له‌ حه‌وته‌مین ساڵڕۆژی كۆمه‌ڵكوژی ئێزیدییه‌كان و كاره‌ساتی له‌بیرنه‌كراوی شه‌نگال دا، كه‌ به‌داخه‌وه‌ ئازار و خه‌موژانی منداڵ و خوشك و برا ئێزیدییه‌كان هه‌ر به‌رده‌وامه‌، دروود بۆ گیانی شه‌هیدان و قوربانییانی ئه‌و كاره‌ساته‌ ده‌نێرم، جێگای داخ و شه‌رمه‌ هێشتا ئاسه‌واره‌كانی ئه‌و كاره‌ساته‌ كاولكارییه‌ به‌ شه‌نگالی ئازیزه‌وه‌ دیاره‌ و هه‌وڵی لایه‌نه‌ په‌یوه‌ندیداره‌كانیش، بۆ بوژاندنه‌وه‌ی شه‌نگال و یارمه‌تیدانی ئێزیدییه‌كان تا بتوانن ژیانی خۆیان بنیات بنێنه‌وه‌، له‌ ئاست پێویستی ژیانی و چاوه‌ڕوانیاندا نییه‌.

ئێزدییه‌كان وه‌ك یه‌كێك له‌پێكهاته‌ ڕه‌سه‌ن و دێرینه‌كانی كوردستان و دانیشتووانی ڕه‌سه‌نی ناوچه‌كه‌، به‌ یه‌كێك له‌ سیما دیاره‌كانی پێكه‌وه‌ژیانی ئایینی و فره‌كولتووریی گه‌لی كوردستان داده‌نرێن، بۆیه‌ له‌ كاركردن به‌ئامانجی به‌ره‌وپێشچوونی كه‌یسه‌كه‌یان له‌ئاستی نێوده‌وڵه‌تی و ناوخۆدا به‌رده‌وام ده‌بین و بێدرێغی هه‌موو پاڵپشتییه‌كیان لێ ده‌كه‌ین.

له‌م ساڵڕۆژه‌ خه‌مناكه‌دا، له‌پێناو رێگریكردن و دورخستنه‌وه‌ی شه‌نگال له‌ شه‌ڕ و پێكدادان و كاره‌ساتێكی دیكه‌، كه‌ بێگومان قوربانییه‌كانی به‌ پله‌ی یه‌كه‌م دانیشتووانی ئێزدینشینی ناوچه‌كه‌ ده‌بێت، پێویسته‌ كۆمه‌ڵگه‌ی نێوده‌ڵه‌تی به‌وپه‌ڕی گرنگی پێدانه‌وه‌ راسته‌وخۆ چاودێریی دۆخی ناوچه‌كه‌ بكات، تاوه‌كو به‌هیچ پاساوێك هیچ هێز و لایه‌نێك ئه‌و مافه‌ به‌خۆی نه‌دات پیلان و كاره‌ساتێكی تر به‌سه‌ر ئێزیدییه‌كاندا بهێنێت.

شاناز ئیبراهیم ئه‌حمه‌د

PUKmedia تایبه‌ت