دنیاکە

دنیاکە
ناوێرم بڵێم کام عیللەتخانەیە باشترە، بەڵام ئەگەر قەرزی صەدوبیستت کردووە، لە مڕۆ زووتر نییە بڕۆ با کۆئەندامی واقوڕمانت بۆ دەربهێنن، چونکێکم تەئریخ ئیسپاتی کردووە و جوغرافیای خوارزاشی شایەتە کە لەم وڵاتی هاجوج و ماجوجەدا هەموو نەشیاوێک شیاوە. ئەو کارەساتەی کە بە خەونی شەوانیش جورئەتی نەئەکرد سەرو دڵت بگرێ، ئێستا بە رۆژی نیوەڕۆ لاقەی ئەقڵ و مەنتیقت ئەکات.. کاکە شێخەکەی خۆمان، خەبیری هەور و تەعزێ، ئاگادارەکەی خشەی مار و مێروو، دارای کەشناسی ئەفەرمووێ دەردیسەرییەکە میلیمەترێک خەتای وڵات و وڵاخدارەکانی ساحێبی نییە، بەڵکو دنیاکە خۆی بە عام خوێڕی بووە نموونەشی زۆرە. مەسەلەن ئەڵێ:
1- لەو باوکە ئەچێ کە گوارەکەی دایکت ئەفرۆشێ بە حساب رۆن و برنج بکڕێ کەچی لەوسەرەوە بەکارتۆنێ عارەقەوە خۆی دەكاتەوە بە ماڵدا.
2- رێک تەبیعەتی ئەو دکتۆرەی لێ نیشتووە کە تۆ ئەچیتە خزمەتی بۆئەوەی دەرمانی زەغطەکەت بۆ بگۆڕێ، بەڵام ئەو ئامبازت ئەبێ ئەڵێ بەقوربانە فەحسێکم بکە بزانە ئاخۆ ناوکم نەكەوتووە.
3- وەک ئەو شایەرە وایە کە هێناویانە ماستاو بۆ وەزعەکە بکات و بڵێ ماشەڵڵاماشەڵڵا، کەچی شتەکەی لێ غەڵەت ئەبێ و ئەفەرموێ نەعوزوبیللا.
4- سەگێکی هەوشارە لە توولەییەوە خۆت بەخێوت کردووە و راتگرتووە بۆ ئەوەی ئاگای لەمەڕەکان بێ، کەچی مۆبایلەکەی پڕە لە ئیمەیڵی نهێنی بۆ گورگەکانی دەرودراسێ.