کوردایەتی واتا حزبایەتی

ستران عەبدوڵڵا

بەشی حەڤدەهەم

هۆشیاری و رۆشنبیری سیاسی و حزبی بنچینەیە

بە داخەوە ئێستا سەرنجێکی هەڵە و چەوت و ناڕەوا لە نێوەندی سیاسی بە گشتی و ‏نێوەندی حزبایەتی بە تایبەتی بڵاوبۆتەوە کە رۆشنبیری و هۆشیاری لە کایەی سیاسی و فیکری، وەک ‏کاری دەستەبژێر و کەسانی گۆشەگیر و خەیاڵپڵاو دەناسێنن، گوایا کەسانی دەستوپێ سپی و هیچ ‏لەبارا نەبوون لە بواری پراکتیک و کاری مەیدانیدا.

ئەو ئاراستە نا راست و تەشەنەسەندو و خراپە، ‏هۆشیاری سیاسی و فیکری ئەندامانی حزب و هەڤاڵەکانی ئەفرۆزە دەکات و وەک باسی ‏ئەفسانە و شیعر و حیکایەتخوانی وێنای دەکات، لە کاتێکدا هەرگیز مەبەست لە هۆشیاری ‏سیاسی و رۆشنبیری فیکری ئەوە نییە کایەی ئەدەب و کەلتوور و هونەرە جوانەکان بێت، ‏کە ئەم کایانەش بۆ ژیار و بۆ کۆمەڵ و بۆ ژیان گرنگن و فەرهەنگی بەرزن و ئەوی دژیان ‏دەبێت، هی ئەوەیە رەخنەباران بکرێن و بیرۆکە دواکەوتووەکانیان رەشبکرێتەوە.

بێگومان (ئەدیب)ەکان و زەحمەتکێشانی هونەرە جوانەکان خۆیان بە غیرەتن و دەتوانن داکۆکی لە خۆیان بکەن، بەڵام مەبەستی ‏ئێمە بە تایبەتی هۆشیاری سیاسی، رۆشنبیری حزبی و رێکخراوەیی و تێگەیشتنە لە رەوتی ‏مێژووی نەتەوە و کۆمەڵگە و ئەزموونی خۆیی و ئەزموونی گەلان، کە بێ ئەم هۆشیارییە ‏چۆنایەتییە هەرگیز کادیری سیاسی و هەڤاڵی حزبی توانا و لێهاتووییان بەرز نابێتەوە و ‏بەشی ئەرکە سیاسییەکانی حزب لەناو مەعمەعەی ململانێی سیاسی لەگەڵ نەیاران ناکات.‏

پێغەمبەری موسڵمانان، درودی خوای لەسەر بێ، بە (أقرأ) دەستی پێکرد، هەموو فیکر و بزووتنەوەیەکیش بە فیکر و ئەندێشە دەست پێدەکات و ئینجا وەکو ئەسپسواری ناو رۆمانەکان لەسەر زەمینی واقیع رمبازێن و ئەسپسواری دەکا و دەباتەوە، مام جەلال گەورەترین و بەتەمەنترین تێکۆشەری بواری حزب لە زمانی ئەدەبیاتی چەپەوە دەڵێ: نووسین و بیرکردنەوەش کار و کردارە. بۆیەش دەستەواژەی رەنجدەرانی بیروبازووی لە ئەدەبیاتی حزبیدا داهێنا.

ئەسڵەن لەپای نەبوونی هۆشیاری و رۆشنبیری سیاسی حزبییە، دەبینین زۆر تێکۆشەری دڵسۆز و ئازا و خەباتگێڕ تووشی لەرێ لادان و چوونە سەرجادەی خۆڵ و نەریتی بتپەرستی و خودپەرستی و پیاو پیاوێنە دەبێت.

بێ ئەم پاشخانە هۆشیاری و رۆشنبیرییە لە بواری فەرهەنگی حزبی و تێگەیشتنی سیاسی، ‏هەرگیز کادیرێکی حەریفمان دەست ناکەوێت کە تەنها پشت بە ئەزموونی رۆژانە و ‏بەرجەستە و تاقیکردنەوەی هەڵە و راستکردنەوە ببەستێت، رۆشنبیری سیاسی و حزبی ‏وەک هەر رۆشنبیرییەکی تر ئەزموون و دەرفەت کورت دەکاتەوە و دەیکاتە شتێکی ‏بەردەست و چڕبۆوە کە یارمەتی سەرکەوتن و بردنەوە دەدات.‏

رۆشنبیریی سیاسی و فیکری خەزینێکی بەدەست هاتووە، بەهرە و توانای زاتی گەشە پێدەدات. وادەکات بەهرە، ئەگەر هەبێ، بەو رۆشنبیرییە سەد قات گەشە بکات و، ئەگەر نەشبێ، بە هەر پلە و جۆرێک بێت دەتوانێ بە ئەزموون قەرەبووی بێ بەهرەیی بکاتەوە.

بەهرە بۆ حزبایەتی و هەڤاڵ و کادری حزبی مەرجی یەکەم و سەرەکی نییە، چونکە حزب هەزاران ئەندامی هەیە کە مەرج نییە یەکسان بێت بە هەزاران بەهرە، بەڵام گرنگە یەکسان بێت بە هەزاران دڵسۆز و وەفادار و خەباتگێڕی بە هیممەت کە رۆشنبیری سیاسی و فیکری رێگایان بۆ کورت دەکاتەوە، ئەزموونیان بۆ دێنێتە بەردەم ماڵ و مەقەڕ.

بابەتی رۆشنبیری لە هەموو بوارەکانی ژیانی ئاساییدا، ژیانی کورتی مرۆڤەکان درێژ و فراوان دەکات و ئەزموونی سەربار دەبێت، بێگومان بۆ رۆشنبیری حزبی و رۆشنبیری هەڤاڵان هەروا دەبێت. رۆشنبیری حزبی ئەزموون کورت دەکاتەوە و تەمەنی هەڤاڵ لە حزب و تەمەنی حزبیش لە کاریگەری ناو کۆمەڵ زیاتر و زیاتر دەکات، رێ لە هەڵە و پەڵەی چاوەڕوانکراو دەگرێت، چونکە ئەزموونی دووبارە رەت دەکاتەوە.

سەرەنجام رۆشنبیری سیاسی و فیکری کە لە هەموو کایەکانی ژیانی حزبایەتیدا پێویستن، پەرۆشی خۆڕسکانە و نییەتی خزمەتکردنی دەوێت. بەڵام ئەم رۆشنبیرییە پێویست و گرنگە نابێ بۆ رێککەوت و لەناکاو و گوایە(هەرچۆنێک بێت) بەجێ بهێڵدرێت.

دەبێ حزب بەرنامەی بۆ دابنێ و خۆی رۆڵی سەرەکی بگێڕێت لە دروستکردن و پەرەپێدانیدا، هەرچەندە بوونی ئەم پەرۆشییە، یاخود نەبوونی، وەک پرسیارێکی ئەزەلی ژیان دەمێنێتەوە، مام جەلال لە سیمیناری پێویستی دانانی بەرنامەی رۆشنبیری حزبیدا، دوای ئەوەی زنجیرەیەک ناونیشان و چۆنێتی خوێندەوەیان دیاری دەکات، لە کۆتاییدا بە زمان و هەناسەی هەڤاڵێکی پەرۆشی حزبی دەڵێت:(لە کۆتاییدا خۆ رۆشنبیرکردن بابەتێکی زاتییە کە دەبێ کادر خۆشی خەمی لێ بخوات و بە دڵنیاییەوە بەدوای چارەسەریدا بگەڕێت).

درێژەی هەیە

PUKMEDIA