کوردایەتی واتا حزبایەتی

ستران عەبدوڵڵا

بەشی شانزەهەم

لەم تێکۆشانە حزبییە، دەستە جەمعییە ئاساییەدا روودەدا کە بەهۆی ململانێ و بەریەککەوتنی سیاسییەوە تێکۆشەران سیاسەت بکەن و ئالوودە و تووشی ئەوەش بن کە سیاسەت لەگەڵ یەکتریشدا بکەن، بەڵام ئەم سیاسەتکردنە دەبێ جورعەیەکی کەم و وەک دەرمان بە کەوچک بێت و لە چوارچێوەی ئەو پێوەرانە بێت کە ناکۆکی لاوەکییە و لە چاو ناکۆکی سەرەکی کە لەگەڵ داگیرکەران و لەگەڵ نەیارانی سیاسییە، هی ئەوە نییە ئەجیندا و رۆژەڤێکی زۆری بۆ تەرخان بکرێت و سیاسەتی بێ رەحمانەی پێوە بکرێت. ئەوکاتەی ململانێ و سیاسەتی هەڤاڵ لەگەڵ هەڤاڵ و هەڤاڵان لەگەڵ یەکتری جێی خەباتی هاوبەش دژی نەیارانی سیاسی و دوژمنانی دەرەکی گرتەوە، ئیتر ئەوە رەچەتەیەکە بۆ پاشەکشێ کردن و لە جێگەمانەوەی حزب لە ململانێی سیاسیدا، وەسفەیەکی خۆکوژییە و پێدانی دەسکەوت و پێ قەدەمە بە نەیاران، بێ ئەوەی هیچ کۆشش و خەرجییەک بکەن لە ململانێی رووبەڕوودا، بگرە دیارییەکی بەنرخە، بەڵام بەنرخێکی هەرزان وەک ماشەڵڵای لێ بێت لە چەند نموونەی خۆماڵی دا بینیومانە و تائێستاش کوردایەتی و حزبایەتی و پرۆسەی دیموکراسی بە دەستییەوە دەناڵێنێ و گیری خواردووە.

لەبەر ئەوەیە زۆر گرنگە ئەم دۆخە دەستنیشان بکەین کە رکابەری ناوخۆیی و خۆبەخۆیی ناو حزب وەختێک دەکێشێ بۆ ملشکاندن و سیاسەت بە یەککردن و سیاسەتپێکردنی ناوخۆیی هەڵە و شاشییەکی حزبایەتی و کوردایەتی و سیاسی گەورەیە و لەجێ دانانی ناکۆکی دۆستانە و وەلاوەنانی ناکۆکی سەرەکییە. 

دەستنیشانکردنەکە لەمەوە دەستپێدەکات، کە تێبگەین بزانین لە دیاردەی تەکەتول و بەوەسفی مام جەلال (کلک گرێدان) مەترسیدارتر دیاردەی (تەکەلوس)، واتا مەیین و مەنگبوونی ریزبەندی سیاسییە، کە رووی تیر و دەسرێژ لە نەیارەوە بۆ یار و هاوڕاز و هاوخەبات دەگۆڕێت و سەنگەرەکان دەشەمزێنێ و کاغەزە سیاسییەکانیش لە فایلی هەڵە و پەلەدا تێکەڵ و پێکەڵ دەکات.

ئیتر باسوخواسەکە لەوە دەردەچێ خەبات بێت بۆ ئامانجی سیاسی هاوبەش لە کوردایەتی و دیموکراتی و هەموو ویستە نیشتمانییە هاوبەشەکان، بەڵکو دەبێتە (خەبات) بۆ قوڕگیرانەوە و قوڕگرتنەوە بۆ یەکتری، لەوە دەردەچێت (تێکۆشان) بێت بۆ یەک ئامانجی هاوبەش و دەبێتە (تێگوشین) و داو نانەوە بۆ یەکتری. 

بەڵێ وایە، لەم جۆرە سیاسەتە لەگەڵ هاوخەبات و هەڤاڵی حزبی زیرەک و لێهاتوو و براوەی لە بابەتی پەندە عیراقییەکە کە دەڵێ (عوافی اللی یجب نقش)، بەڵام راستێکەی ئەمە زیرەکییەکی شەڕەنگێز و ژیرییەکی بەڵا ئامێزە، کەڵکی حزب و بزووتنەوەکەی پێوە نییە و کەڵکی بەرژەوەندی تەسکی هەڤاڵێک یان چەند هەڤاڵێکی پێوەیە، کە درەنگتر دەزانن راستە بردوویانەتەوە، بەڵام دوایی دەبینن و دەزانن حزبەکەیان دۆڕاوە و ئەوی ئەوانیش بەدەستیان هێناوە هیچی لێ شین نابێ، مەگەر ئەوەی لە زەینی خەڵکی تر و شوێنی تر بچێت و ناشزانرێ بەرهەمی چۆن دەبێ؟

لەبەر ئەو خەسارەت و تەلەفەیە، کە هەر ئەوەی پێوەیە بڵێین ئەزموونە و شایانی دەرس لێوەرگرتنە بۆ ئەوەی دووبارە نەکرێتەوە و نەبینە پەن و مایەی گاڵتەجاری.

سەرەنجام دەگەڕێینەوە بۆ سەرەتای وتار و سەرەتاکانی پرەنسیبی دروست: حزبایەتی خەباتە لەگەڵ هەڤاڵانی حزب و سیاسەتیش لەگەڵ نەیاری دەرەوە. هەر ئەمەیە رێگای ئاوریشمینی سەرکەوتنی حزب و بزووتنەوەکەشی.

درێژەی هەیە

PUKMEDIA