كه‌رنه‌ڤاڵی ره‌نگه‌كان له‌ ئه‌ڵمانیا كۆتایی هات

.

هه‌فته‌یه‌كه‌ له‌ شاری كۆلن له‌ ئه‌ڵمانیا كه‌رنه‌ڤاڵی ره‌نگه‌كان به‌رێوه‌ده‌چێت.

له‌ كه‌شێكی باراناوی و تاڕاده‌یه‌ك ساردا یه‌كه‌م رۆژی كه‌رنه‌ڤاڵی ره‌نگه‌كان به‌رێوه‌چوو.

كه‌رنه‌ڤاڵی ره‌نگه‌كان بریتیه‌ له‌جه‌ژنی ئاشتی و پێكه‌وه‌ ژیان و ساڵانه‌ له‌ ئه‌ڵمانیا به‌ڕێوه‌ده‌چێت .

له‌پاش وڵاتی به‌رازیل  دووه‌م گه‌وره‌ترین كه‌رنه‌ڤاڵ له‌جیهاندا  له‌شاری كۆلن به‌رێوه‌ده‌چێت و ساڵانه‌  جگه‌ له‌ شاره‌كانی ئه‌ڵمانیا له‌هه‌موو وڵاتانی دونیاوه‌ خه‌لكانێكی زۆر به‌شداری ئه‌م كه‌رنه‌ڤاڵه‌ ده‌كه‌ن .

لای به‌شێك له‌ كریستیانه‌كان ئه‌م كه‌رنه‌ڤاڵه‌ به‌شێكه‌ له‌ جه‌ژنی ئاینی و له‌مڕۆژه‌دا به‌رۆژوو ده‌بن.

یه‌كێك له‌ تایه‌به‌ت مه‌ندیه‌كانی ئه‌م كه‌رنه‌ڤاڵه‌ یه‌كه‌م رۆژی به‌رۆژی بڕیار به‌ده‌ستی ژنان ده‌ست نیشان كراوه‌و ژنان هه‌ر بڕیارێك بده‌ن ده‌بێت پیاوه‌كه‌ی جێبه‌جێی بكات .

به‌شداربوانی كه‌رنه‌ڤاڵی ره‌نگه‌كان به‌جلوبه‌رگی ناوازه‌ی ره‌نگاو ره‌نگ و میكیاژی جۆراوجۆره‌وه‌ كه‌ زۆربه‌ی خۆی له‌لاسایكردنه‌وه‌ی كه‌سایه‌تیه‌ جیهانیه‌كان به‌تایبه‌ت كه‌سایه‌تی نێو فیلمه‌ جۆراو جۆره‌كانی هۆلیود وه‌ك كه‌سایه‌تی كۆمیدیه‌كان و ترسناك و ئه‌كشن و كه‌سایه‌تی نێو فیلم كارتۆنه‌كانییش له‌خۆ ده‌گریت ، هه‌مویان  گوزارشت له‌وه‌ ده‌كه‌ن كه‌ له‌نێو كۆمه‌ڵگای ئه‌ڵمانیادا هه‌موان ده‌توانین به‌ ئاشتی پێكه‌وه‌ بژین .

لایه‌نی ئه‌منی گرنگیه‌كی زۆری پێدراوه‌و هێزه‌كانی پۆلیس له‌ هه‌موو به‌شه‌كانی كه‌رنه‌ڤاڵ ئاماده‌ییان هه‌یه‌.

وه‌ك هه‌ندێك له‌ ئه‌ڵمانییه‌كان ئاماژه‌یه‌ن پێدا له‌ دوای هێرشه‌ تیرۆریستیه‌كانی پاریسه‌وه‌ ترسیان هه‌یه‌ ، له‌ راگه‌یاندنێكیشدا به‌رێوه‌به‌ری پۆلیسی كۆلن رای گه‌یاند ۲۰۰۰ پۆلیس چاودێری ره‌وشی ئه‌منی كه‌رنه‌ڤاڵه‌كه‌ ده‌كه‌ن .

ئه‌مرۆ سێشه‌ممه‌ 8-2- 2016 دوا رۆژی كه‌رنه‌ڤاڵ بوو كه‌ به‌ ئاپۆرایه‌كی گه‌وره‌ و به‌شێوازی تایبه‌ت به‌ خۆیان كه‌ ئاماده‌كارییه‌كی زۆری بۆ كراوه‌ به‌ناو سه‌نته‌ری شاری كۆلندا تێپه‌ری و به‌ به‌خشینی شیرین و گوڵ به‌سه‌ر هاوڵاتیاندا كه‌  ئاماژه‌یه‌ بۆ مانای كه‌رنه‌ڤاڵه‌كه‌ كه‌ به‌ جه‌ژنی ئاشتی و پێكه‌وه‌ ژیان ناسراوه‌  .

سه‌رۆكی كه‌رنه‌ڤاڵ مایكل یانسن له‌ لێدوانێكدا بۆ كه‌ناڵه‌كانی راگه‌یاندن باسی له‌وه‌ كرد بۆ دوارۆژی كه‌رنه‌ڤاڵ مه‌ترسی ئه‌وه‌مان هه‌بوو كه‌ش و هه‌وا ڕێگربێت له‌ به‌ڕێوه‌چوونی به‌رنامه‌ی كه‌رنه‌ڤاڵ وه‌ك خۆی له‌به‌ر ئه‌وه‌ی ئه‌مڕۆ ئه‌گه‌ری باران و بایه‌كی به‌هێز هه‌بوو روو له‌ شاره‌كه‌مان بكات ، به‌ڵام به‌ خۆشحاڵیه‌وه‌ زۆر به‌باشی به‌رێوه‌چوو .

شیاوی باسه‌ كه‌رنه‌ڤاڵی ئه‌م ساڵ بڕی ۳۰ ملێۆن یۆرۆی تێچووه‌كه‌یه‌تی و ژماره‌یه‌كی زۆر هاوڵاتی له‌ ده‌ره‌وه‌ی ئه‌ڵمانیاوه‌ هاتوون بۆ بینینی كه‌رنه‌ڤاڵه‌كه‌.

PUKmedia وێنه حه‌مه‌ عه‌لی غه‌ریب - كۆلن ، ئه‌ڵمانیا