به‌وێنه‌ .. هێزێكی تر به‌شداربووه‌ له‌ رزگاركردنی فڕۆكه‌وانه‌ روسیایه‌كه‌

له‌لایه‌ن وه‌زاره‌تی به‌رگری روسیاوه‌ خه‌ڵاتكراون

ئاژانسه‌كانی هه‌واڵی روسیا وێنه‌ی چه‌ند سه‌ربازێكی هێزی تایبه‌تی رژێمی سوریایان بڵاوكردوه‌ته‌وه‌ كه‌ به‌شداربوون له‌ رزگاركردنی یه‌كێك له‌ دوو فڕۆكه‌وانه‌ روسیایه‌كه‌ ، كه‌ فڕۆكه‌كه‌یان له‌لایه‌ن فڕۆكه‌ جه‌نگیه‌كانی توركیاوه‌ كرایه‌ ئامانج .

به‌پێی زانیاریه‌كان ، له‌سه‌روبه‌ندی خستنه‌خواره‌وه‌ی فڕۆكه‌ جه‌نگیه‌كه‌ی روسیا، ژماره‌یه‌ك سه‌ربازی هێزی تایبه‌تی رژێمی سوریا چوونه‌ته‌ شوێنی كه‌وتنه‌ خواره‌وه‌ی فڕۆكه‌و روبه‌ڕووی هێزه‌ چه‌كداره‌ توركمانه‌كان بوونه‌ته‌وه‌و بۆ ماوه‌ی 12 سه‌عات له‌ ئۆپراسیۆنی رزگاركردنی یه‌كێك له‌ فڕۆكه‌وانه‌كان به‌شداربوون . 

ئاژانسه‌ روسیایه‌كان باسله‌وه‌شده‌كه‌ن : ئۆپراسیۆنی رزگاركردنی دوو فڕۆكه‌وانه‌ روسیایه‌كه‌ له‌ 24-11-2015 دوای 15 ده‌قیقه‌ له‌ خستنه‌خواره‌وه‌ی فڕۆكه‌ی جه‌نگی جۆری سیخۆ – 24ی له‌سنوری سوریا – توركیا ده‌ستی پێكرد ، و  فڕۆكه‌وانی سه‌ره‌كی فڕۆكه‌كه‌ به‌ناوی ئۆلیگ بیشكۆف له‌كاتی خۆ فڕێدانه‌ خواره‌وه‌یه‌ له‌لایه‌ن ژماره‌یه‌ك چه‌كداری هێزه‌ توركمانه‌كان ته‌قه‌ی لێكراوه‌و كوژراوه‌ . 

ئاماژه‌ بۆ ئه‌وه‌شكراوه‌: به‌ڵام فڕۆكه‌وانی دووهه‌م به‌ناوی قوسته‌نتین موراختین له‌لایه‌ن چه‌ند هه‌لیكۆپته‌رێكی روسیایه‌وه‌ چاودێریكراوه‌و دواتر به‌پشتیوانی هێزه‌ تایبه‌ته‌كانی سوپای سوریا، له‌لایه‌ن هیلیكۆپته‌ره‌ روسیایه‌كانه‌وه‌  رزگاركراوه‌ .

 هه‌رله‌و ئۆپراسیۆنه‌دا ئه‌لیسكه‌نده‌ر پۆزینیچ له‌هێزه‌كانی ده‌ریایی  روسیا كوژراوه‌.

ئۆپراسیۆنه‌كه‌ له‌نێوان ناوچه‌ی دورین و چیایی توركماندا ئه‌نجامدراوه‌. 

هه‌ربۆیه‌ به‌هۆی ئه‌و هاوكاری و پشتیوانیه‌ی هێزه‌ تایبه‌ته‌كانی سوپای سوریا ، له‌لایه‌ن وه‌زاره‌تی به‌رگریه‌وه‌ رێز له‌و سه‌ربازه‌ سورییانه‌ گیراوه‌. 

PUKmedia و ، سامان