ئه‌نجومه‌نی شاره‌وانی سلێمانی كاره‌كانی ده‌ستپێكرده‌وه‌

له‌كۆبونه‌وه‌ی ئه‌مڕۆدا دوو بڕیاری گرنگ دران كه‌ ئامانجی خزمه‌تكردنی شاره‌

دوای چه‌ندین مانگ هه‌ڵپه‌ساردنی كۆبوونه‌وه‌كانیان، به‌ئاماده‌بوونی پارێزگاری سلێمانی ئه‌نجومه‌نی شاره‌وانی سلێمانی به‌ئاڕاسته‌ی هه‌ماهه‌نگی و هاوكاریكردنی ده‌زگا ئیدارییه‌كانی سنوری سلێمانی بۆ پێكه‌وه‌ خزمه‌تكردنی شارو فراوانكردنی ده‌ستی ئاوه‌دانی كۆبوونه‌وه‌كانی ده‌ستپێكرده‌وه‌.

د.ئاسۆ فه‌ره‌یدون پارێزگاری سلێمانی ده‌ستخۆشی له‌سه‌رۆكی شاره‌وانی و ئه‌نجومه‌نی شاره‌وانی كرد كه‌ له‌م بارودۆخه‌دا په‌رۆشی سلێمانین، داواشیكرد له‌مه‌ودا ئه‌نجومه‌نی شاره‌وانی وه‌ك هه‌میشه‌ هاوكاریانبن بۆ گه‌یاندنی خزمه‌ت و باشتركردنی كاره‌كان و كۆبونه‌وه‌كانیان به‌ شێوه‌یه‌ك بێت كه‌ ره‌نگدانه‌وه‌ی زیاتر خزمه‌تكردنی خه‌ڵك و سلێمانی بێت
پارێزگاری سلێمانی.

 وتیشی: له‌كۆبونه‌وه‌ی ئه‌مڕۆدا دوو بڕیاری گرنگ دران كه‌ ئامانجی خزمه‌تكردنی شار كه‌ ئه‌وانیش ته‌رخاكردنی زه‌ویه‌ بۆ دروستكردنی دوو بازاری میلی و بنیادنانی چه‌ند شه‌تڵگه‌یه‌كی مۆدێرن و به‌رنامه‌شمان داناوه‌ له‌ كۆبونه‌وه‌ی داهاتوودا چه‌ند بڕیارێكی دیكه‌ ده‌ربكه‌ین.

هه‌ر له‌و كۆبونه‌وه‌یه‌دا كه‌ ئه‌ندازیار یوسف یاسین سه‌رۆكی شاره‌وانی سلێمانی ئاماده‌ی بوو باس له‌چۆنێتی هه‌ماهه‌نگی زیاتری پارێزگاو شاره‌وانی و یه‌كه‌ ئیداریه‌كان كراو كه‌كاروباره‌كان به‌شێوه‌یه‌ك رای بكرێن سلێمانی سودمه‌ندبێت لێی.

له‌لێدوانێكیشدا شێخ عومه‌ر مه‌حوی سه‌رۆكی ئه‌نجومه‌نی شاره‌وانی سلێمانی ده‌ستپێكردنه‌وه‌ی كۆبونه‌وه‌كانیانی راگه‌یاندو وتی: وه‌ك رابردوو ئیتر ده‌ستبه‌كار ده‌بینه‌وه‌و خه‌مان خزمه‌تكردن و به‌ته‌نگه‌وه‌ چوونی هاووڵاتیان ده‌بێت تا پێكه‌وه‌ ئه‌و ئه‌ركه‌ی له‌سه‌ر شانمانه‌ به‌پشت به‌ستن به‌ یاسا رایپه‌رێنین.

PUKmedia كوردۆ عه‌لی