چیرۆكی شەهیدبوونی پێشمەرگەیەكی دێرینی هەڵەبجەیی
kurdistani 11:15 AM - 2014-08-25شەهیدانی بەرگری لە كوردو كوردستان
شەهیدانی بەرگری لە كوردو كوردستان
سەعات 8ی بەرەبەیانی رۆژی هەینی 22ی ئاب، لەكاتی كۆنترۆڵكردنی دوو مۆڵگەی تیرۆریستانی داعشدا لەشارۆچكەی جەلەولا، حەمەڕەشید ئەحمەد هەڵەبجەیی ناسراو بە «مامە رەشە» فەرماندەی قارەمانی هێزی پێشمەرگەی كوردستان شەهیدبوو. هەمان رۆژ لەمەراسیمێكی جەماوەریی بەرفراواندا لەگۆڕستانی عەبابەیلێی زێدی خۆی تەرمەكەی بەخاكسپێردرا، ئەندامێكی سەركردایەتی یەكێتیش روونیدەكاتەوە؛ یەكێتیو پێشمەرگەو خەڵكی هەڵەبجە فەرماندەیەكی قارەمانو پاڵەوانێكی مێژوویی لەدەستداوە. ئەو دوو پێشمەرگەیەش، كە لەدەستەی هێرشبەرانی هاوەڵی شەهید حەمەڕەشید بوون، چیرۆكو چۆنێتی شەهیدبوونەكەی بۆ كوردستانی نوێ دەگێڕنەوە.
دەستی گەیاندە بیكەیسی-یەكە!
كاتژمێر 5ی بەرەبەیان، هێرشی هێزی پێشمەرگە لەمیحوەری جەلەولا لەچەند قۆڵێكەوە دەستیپێكرد، دەستەی هێرشبەران بەخێرایی خۆیان گەیاندە مۆڵگەكانی داعش. بێستوونی كەمئەندامان، كە بەشداریی شەڕەكەی جەلەولای كرد، لەمەراسیمی بەخاكسپاردنی شەهید حەمەڕەشیددا بۆ كوردستانی نوێ وتی: «شەهید حەمەڕەشید فەرماندەیەكی ئازاو چاونەترس بوو. پیاوی كۆنترۆڵكردنی ناوچە سەختەكان بوو. پێشمەرگەی شەڕە گەورەكان بوو. هەربۆیە هەمووكاتێك لەكاتی هێرشبردندا لەدەستەی هێرشبەراندا بوو. ئەستەمە پەلاماری هەر شوێنێكی دابێتو نەیگرتبێت». وتیشی: «بەرەبەیانی رۆژی هەینی مەفرەزەیەكی پێشمەرگە بەفەرماندەیی شەهید حەمەڕەشید لەقۆڵی بەنزینخانەی جەلەولاوە هێرشمان بردەسەر مۆڵگەكانی داعش، لەماوەی چەند خولەكێكی كەمدا شەهید حەمەڕەشید خۆی گەیاندە ناو بەنزینخانەكەو كۆنترۆڵمانكرد، لەناو بەنزینخانەكەدا بەرنامەمان داڕشت بۆئەوەی رەبیەیەكی تری داعش، كە لەبەرامبەر بەنزینخانەبوو، كۆنترۆڵ بكەین، منو سەڵاح گریانەییو شەهید حەمەڕەشید پەلاماری رەبیەكەی داعشمانداو چەند تیرۆریستێك كوژران، شەهید حەمەڕەشیدیش لە سەنگەرەكەی داعش نزیك بۆوە، لەوكاتەدا لە رەبیەكەی داعشدا بیكەیسییەك تەقەی دەكرد، شەهیدی نەمریش دەستی گەیاندە بیكەیسییەكەو بەدەست بیكەیسییەكەی راكێشا، لەوكاتەدا گولەیەكی ئەو بیكەیسییە كاك حەمەڕەشیدی پێكاو دەستبەجێ شەهیدبوو».
هاوەڵەكەی شەهید حەمەڕەشید روونیكردەوە؛ توانیمان مۆڵگەكەی داعش كۆنترۆڵ بكەینو تۆڵەی شەهید حەمەڕەشیدمان كردەوە.
ئەو داعشی دەناسی
12 ساڵ بەر لەئێستاو لەكاتی كێوماڵكردنی تیرۆریستانی جوندولئیسلام لەنزیك شاخی شنروێ لە هەڵەبجە، حەمەڕەشید ئەحمەد وەك فەرماندەیەكی قارەمان دوای بەشداریكردنێكی ئازایانە لەكێوماڵكردنەكەدا، بەدەستی تیرۆریستان بەسەختی بریندار كرا. لەوبارەیەوە حەمەی حەمەسەعید ئەندامی سەركردایەتی یەكێتیی نیشتمانیی كوردستانو هاوڕێی شەهید وتی: «كاتێك تیرۆریستانی جوندولئیسلام لەهەڵەبجەو هەورامان بوون، حەمەڕەشید بەردەوام لەهێرشەكانی هێزی پێشمەرگەدا سەرمەشق بوو، ئازاو تۆقێنەربوو، هیچ كاتێك سڵی لەگوللەو تیرۆر نەدەكردەوە. ئەو بەباشی تیرۆریستانی دەناسی، دەیزانی كە مەترسی گەورەن لەسەر كوردو ناوچەكە، هەربۆیە لەماوەی سەرهەڵدانی داعشو پەلامارەكانیان بۆ سەر كوردستان، شەهید حەمەڕەشید هەرچەندە خانەنشین بوو، بەڵام وەك پێشمەرگەو خۆبەخشێك بەچەكو كەرەستەی خۆیەوە پەیوەندی بەڕیزی پێشەوەی سەنگەرەكانی پێشمەرگەوە كردو رۆڵی ئازایانەی هەبووە لە تێكشاندنی تیرۆریستاندا». وتیشی: «حەمەڕەشید قارەمانێكی كەموێنەبوو، جێگەی شانازیە بۆ كوردو كوردستانو هەڵەبجە».
خەباتی شەهیدی نەمر
حەمەڕەشید ئەحمەد ساڵی 1963 لەهەڵەبجە لەدایكبووە، پێش راپەڕینی 1991 پەیوەندی بە یەكێتیی نیشتمانیی كوردستانەوە كردووەو لەتیپی 11ی هەورامان بۆتە پێشمەرگە. بەشداری چەندین داستانو نەبەردی هێزی پێشمەرگەی كوردستانی كردووە، دوای راپەڕینیش لەفەرماندەیی شارەزوور درێژەی بەخەباتی پێشمەرگانەی داوەو لەبەر ئازایەتیو لێهاتوویی پلەكانی پێشمەرگایەتی بڕیوەو بۆتە جێگری فەرماندەی فەرماندەیی. دووجار بەسەختی برینداربووە، دوایین پلەی پێشمەرگانەی خانەنشین بووە بەپلەی موقەدەم. لەسەرەتای هێرشەكانی داعش بۆ سەر ناوچە كوردستانییەكانیش، وەك فەرماندەیەكی خۆبەخش پەیوەندی بەهێزی پێشمەرگەی كوردستانەوە كردۆتەوە، سەعات 8ی بەرەبەیانی رۆژی هەینی 22ی ئاب شەهیدبوو.
لەزێدی خۆی بەخاكسپێردرا
بڵاوبوونەوەی هەواڵی شەهیدبوونی حەمەڕەشید ئەحمەد، مایەی غەمێكی قوڵ بوو بۆ خەڵكی هەڵەبجە بەهەموو رەنگەكانەوە، گەنجانو رۆشنبیرانو پێشمەرگەو هاووڵاتیان لەتۆڕە كۆمەڵایەتییەكان غەمو پەژارەیان دەربڕی. سەعات 3ی پاشنیوەڕۆی هەمان رۆژ لەگۆڕستانی گوندی عەبابەیلێی زێدی خۆیو بەئامادەبوونی ژمارەیەك لەئەندامانی سەركردایەتی حزبە كوردستانییەكانو جەماوەرێكی زۆر، بەخاكسپێردرا.
PUKmedia له كوردستانی نوێ-هوه
هەواڵی زیاتر
-
شاڵاو کۆسرەت رەسوڵ: باشترین خزمەتگوزاری پێشکەش بکرێت
07:44 PM - 2024-04-25 -
شاڵاو کۆسرەت رەسوڵ: لیژنە بۆ رووداوی کوشتنی خەسرۆ گەردی پێکبهێنرێت
04:57 PM - 2024-04-25 -
وەسفییە... ماندوویەکی رووخۆش
12:25 PM - 2024-04-25 -
راپۆرتێكی دیكهی نێودهوڵهتی لهسهر خراپی ئازادی لهههرێم بڵاودهكرێتهوه
10:33 AM - 2024-04-25
ئەمانەش ببینە
لە هەولێر و بەغدا زۆرترین پێشێلکاری بەرامبەر رۆژنامەنووسان ئەنجامدراوە
05:13 PM - 2024-04-24
پەیامی یەکێتی دەگەیەنرێتە بەرەی تورکمانی
05:01 PM - 2024-04-24
ئهمریكا: ئازادی رۆژنامهنوسی و مافی مرۆڤ لهههرێم خراپتر بووه
12:30 PM - 2024-04-24
وەفدێکی حکومیی عیراق بەشداری ساڵیادی بۆردومانی قەڵادزێ دەکات
10:14 AM - 2024-04-24
زۆرترین خوێنراو
-
هاوخەمی قوباد تاڵەبانی بۆ خانەوادەی خاتوو نیعمەت
پرسەنامە 08:13 PM - 2024-04-25 -
پرسەنامەی مەکتەبی سیاسی بۆکۆچی دوایی خاتوو نیعمەت
پرسەنامە 07:58 PM - 2024-04-25 -
شاڵاو کۆسرەت رەسوڵ: باشترین خزمەتگوزاری پێشکەش بکرێت
کوردستان 07:44 PM - 2024-04-25 -
شاڵاو کۆسرەت رەسوڵ: لیژنە بۆ رووداوی کوشتنی خەسرۆ گەردی پێکبهێنرێت
کوردستان 04:57 PM - 2024-04-25 -
هاوخەمی سەرۆک بافڵ بۆکۆچی دوایی خاتوو نیعمەت
پرسەنامە 04:11 PM - 2024-04-25 -
وتهبێژی كۆمسیۆن: 10ی ئایار بانگەشەی هەڵبژاردن دەستپێدەکات
کوردستان 01:36 PM - 2024-04-25 -
شێخ جەعفەر شێخ مستەفا: کۆمەڵانی خەڵک چاوی ئومێدیان لە یەکێتییە
ی ن ک 01:29 PM - 2024-04-25 -
وەسفییە... ماندوویەکی رووخۆش
کوردستان 12:25 PM - 2024-04-25