داوای ئاشكراكردنی بكوژانی رۆژنامەنوسەكەی دهۆك دەكرێت

.

لیژنەی داكۆكی لەمافی رۆژنامەنوسان ئیدانەی كوشتنی رۆژنامەنوسەكەی شاری دهۆك دەكات و سەنتەری میترۆش داوای ئاشكراكردنی بكوژانی رۆژنامەنوسەكە دەكات.

حەمید ئەبوبەكر بەدرخان سكرتێری لیژنەی داكۆكی لەماف و ئازادی رۆژنامەنوسان لەسەندیكای رۆژنامەنوسانی كوردستان بە PUKmediaی راگەیاند: ئیدانەی كوشتنی رۆژنامەنوس وه‌دات عەلی حسێن دەكەین لەشاری دهۆك و بەكارێكی ترسنۆكانەی لەقەڵەمدەدەین.

وتیشی: رۆژنامەنوس، هەر بابەتێك بڵاوبكاتەوە، یان سەرپێچییەك بكات، دەتوانرێت لەڕێی یاساوە یەكلایی بكرێتەوە، بەڵام پەنابردن بۆ كوشتن كارێكی ترسنۆكانەیەو دژ بەبنەماكان و ئیتیكی رۆژنامەنوسانە، بۆیە بەتوندی ئەم كارە ترسنۆكانە دژ بەمرۆڤایەتیە ئیدانە دەكەین، هەوڵەكانیشمان دەخەینەگەڕ بۆ دەركەوتنی وردەكاری كوژرانی ئەو رۆژنامەنوسە.

حەمید بەدرخان راشیگەیاند:پێشتر هیوامان دەخواست بكوژانی شەهید (سۆران مامە حەمە، عەبدولستار شەریف، سەردەشت عوسمان، كاوە گەرمیانی) بدۆزرێتەوەو بدرێن بەدادگا، بەڵام رۆژنامەنوسی تر دەكوژرێت.

هاوكات سەنتەری میترۆ بۆ داكۆكی لە رۆژنامەنوسان لە راگەیەنراوێكیدا كە كۆپیەكی دەست PUKmedia كەوتوە، رایگەیاندوە: تاوانی كوشتن بەهەر هۆكارو بیانویەك بێت، نابێت كۆمەڵگا لێی بێدەنگ بێت، ئێمە ئیدانەی كوشتنی رۆژنامەنوس وه‌دات حسێن دەكەین و داوای لێكوڵینەوە جدی دەكەین لەم تاوانە، دەبێت ئەنجامدەرانیشی بدرێنە دادگایەكی ئاشكرا.

سەنتەری میترۆ بۆ داكۆكی لە رۆژنامەنوسان لەڕاگەیەنراوێكدا كە كۆپیەكی بۆ PUKmedia نێردراوە، تیایدا راگەیاندوە: تاوانی كوشتن بەهەر هۆكارو بیانویەك بێت، نابێت كۆمەڵگا لێی بێدەنگ بێت. ئێمە ئیدانەی كوشتنی رۆژنامەنوس وەدات حسین دەكەین و داوای لێكوڵینەوە جدی دەكەین لەم تاوانە، دەبێت ئەنجامدەرانیشی بدرێنە دادگایەكی ئاشكرا.

PUKmediaتایبەت