نوێكراوەتەوە.. سەنگاوی: هێزەكانی پێشمەرگە چوار داعشیان دەستگیركردوە

نزیكەی 90%ی جەلەولا بەدەست پێشمەرگەوەیە

فەرماندەی گشتی هێزەكانی پێشمەرگە لەناوچەی گەرمەسێر رایدەگەیەنێ لەئێستادا نزیكەی 90%ی ناحیەی جەلەولا بەدەست هێزەكانی پێشمەرگەوەیەو داعشیش ناتوانێت شەڕی پێشمەرگە بكات، ئاماژە بەوەدشەدات دوای تەقینەوەكانی دوێنێی جەلەولا قەرەتەپە چوار تیرۆریستی داعشیان دەستگیركردوە.

مەحمود سەنگاوی فەرماندەی گشتی هێزەكانی پێشمەرگە لەناوچەی گەرمەسێر تایبەت بە PUKmediaی راگەیاند: دوای تەقینەوەكانی دوێنێی قەرەتەپەو جەلەولا هێزەكانی پێشمەرگە چوار تیرۆریستی داعشیان دەستگیركردوەو رەوانەی ئاسایش كراون.

ئەو فەرماندەیەكی پێشمەرگە لەناوچەی گەرمەسێر ئەوەشی خستەڕوو كە ناوچەی گەرمەسێر بەتایبەت جەلەولا لەدوای روخانی رژێمی بەعس لەژێر دەستی سوپای عیراقدا بووەو ناوچەیەك بووە كە ئارام نەبووەو بەردەوام لەلایەن تیرۆریستانەوە تەقینەوەیان تێداكردوەو دانیشتوانی ناوچەكە ئیهانەكراون و لەزێندی خۆیان دەركراون، هەروەها عەرەبە هێنراوەكانیش كوردەكانیان دەركردوە، بۆیە دوای روداوەكان و چونی هێزەی پێشمەرگەش بۆ ناوچەكە، لەلایەن داعش و ئەو عەرەبانەوە پەلاماری پێشمەرگە دراوەو رۆژانە لەناوچەكە هێرشدەكەنەسەر پێشمەرگە، بەڵام ناتوانن روبەڕووی پێشمەرگە ببنەوەو شەڕ لەگەڵ پێشمەرگە بكەن.

سەنگاوی وتیشی: نزیكەی 90%ی ناحیەی جەلەولا بەدسەت هێزەكانی پێشمەرگەوەیەو تەنها گەڕەكی تەجنید ماوە كە گەڕەكێكەو بەدەست تیرۆریستانی داعشەوەیەو بۆ ناو سەعدیە درێژدەبێتەوەو ناوچەیەكی دارستانە، ئەوان سەربازگەیەكی سوپای عیراقیان بەدەستەوەیە كە سوپای دوای پاشەكشەی بۆ ئەوانی جێهێشت.

PUKmedia هه‌ڵمه‌ت خانه‌قینی