ئاسۆ مامەند بۆ گەنجانی کەرکوک: بەگیانی بەرپرسیارێتییەوە بانگەشە بکەن

PUKMEDIA

ئاسۆ مامەند

ئاسۆ مامەند بەرپرسی رێکخستنه‌کانی کەرکوک – سەڵاحەدینی یەکێتیی نیشتمانیی کوردستان، پەیامێک ئاڕاستەی جەماوەر و ئەندامانی یەکێتی و سەرجەم چین و توێژەکانی پارێزگای کەرکوک دەکات و ئاماژە بۆ ئەوە دەکات: له‌م قۆناغه‌ گرنگه‌ی كاروانی یه‌کێتیی نیشتمانیی کوردستاندا، داوا له‌ گشت هاوڕێ و لایه‌نگرانی گەنج  ده‌که‌م، که‌ به‌ گیانی به‌رپرسیارێتی، ئارامی و ژیرییه‌وه‌ به‌ره‌و هه‌ڵمه‌تی هه‌ڵبژاردن بچن، که‌ شایسته‌ی مێژووی حزبه‌که‌مان و رێبازی سه‌رکرده‌ی نه‌ته‌وه‌ رەوان شاد مام جه‌لال تاڵه‌بانی بێت.‌

بەرپرسی رێکخستنه‌کانی کەرکوک – سەڵاحەدینی یەکێتیی نیشتمانیی کوردستان، دەشڵێت: مام جه‌لال فێری کردوین که‌ پێکه‌وه‌ژیان و ئاسایش له‌ کەرکوک بنچینه‌ی سیاسه‌تکردنه‌ و رێزگرتن له‌ گشت پێکهاته‌ و لایه‌نه‌کان ئه‌وه‌یه‌، که‌ شه‌رعیه‌تی جه‌ماوه‌ری و مرۆیی به‌ یه‌کێتی ده‌به‌خشێت، بۆیە جه‌خت ده‌که‌ینه‌وه‌، که‌ پێشبڕکێی هه‌ڵبژاردن ده‌بێت هێمن و پاک و بێگەرد بێت و له‌سه‌ر بنه‌مای به‌رنامه‌ و دیدگاکان  پیادەبکرێت، نه‌ک له‌سه‌ر بنه‌مای سووکایه‌تی کردن یان ئاژاوه‌ یان خراپه‌ کردن به‌رانبه‌ر به‌وانی دیکە.

لەپەیامەکەیدا ئەوەشدەخاتەڕوو: کەرکوک هه‌رده‌م وەک نموونه‌یه‌کی پێکه‌وه‌ژیان ده‌مێنێته‌وه‌ و ئێمه‌ له‌ یه‌کێتیی نیشتمانیی کوردستاندا، به‌رپرسیارین له‌ پاراستنی ئه‌م نموونه‌یه‌، به‌ حیكمه‌ت و به‌کاری ئارام و پابه‌ندبوون به‌ ئه‌خلاقی خه‌باتی سیاسییه‌وه‌ که‌ سه‌رکرده‌ پێشینه‌کانمان دایناوه.

ئاسۆمامەند داواشدەکات : با نەهێڵین ناحەزان دەرفەتێک بۆ تێکدانی بارودۆخەکە بقۆزنەوە، لە پێناو بەدیهێنانی ئامانجە ناڕەواکانیان، ئارامى ئەو کەرکوکەی یەکێتییەکەتان ئیدارەی دەکات. ‌

هەروەها دەشڵێت: با پێکه‌وه‌ له‌م هه‌ڵمه‌تی هه‌ڵبژاردنه‌دا به‌ گیانی یه‌کێتی و نەستی گەنجانەوە، رێگای سەرکەوتن بگرینەبەر ,‌ گۆڕانکاریش به‌ ده‌نگی به‌رز نایەتە دی، به‌ڵکو به‌ کاری راستگۆیانه‌ و باوه‌ڕبوون به‌ داهاتوو.

PUKMEDIA