لەهەفتە یادی ئەنفالی گەرمیان و چەمچەماڵدا چەند چالاكییەك بەڕێوەدەچێت

PUKMEDIA

مۆنیومێنتی ئەنفال لەچەمچەماڵ

ئەمساڵ پێنجەمین فێستیڤاڵی فیلمی جینۆساید بەهاوكاری مەكتەبی سكرتارییەتی سەرۆك مام جەلال لەمۆنیومێنتی ئەنفال لەچەمچەماڵ بەڕێوەدەچێت و تێیدا ژمارەیەك فیلم نمایشدەكرێن كە لەسەر مەرگەساتی ئەنفال بەرهەمهێنراون.

رەمك رەمەزان قائیمقامی چەمچەماڵ لەكۆنگرەیەكی رۆژنامەوانیدا رایگەیاند: "فێستیڤاڵەكە بەهاوكاری مەكتەبی سكرتارییەتی سەرۆك مام جەلال و بەچاودێری قوباد تاڵەبانی جێگری سەرۆكوەزیرانی حكومەتی هەرێم بەڕێوەدەچێت، بۆ ئەو مەبەستەش داوا لەدەرهێنەرو سینەماكاران دەكەین كە هەر بەرهەمێكی فیلمیان تایبەت بەجینۆساید یان مەرگەساتی ئەنفال هەیە بۆمان بنێرن".

راشیگەیاند: "تەواوی ئەو فیلمانەی لەكوردستان و عیراق و دەرەوەی وڵات لەسەر جینۆساید و مەرگەساتی ئەنفال بەرهەمهێنراون بەشداریپێدەكرێن و مەرجەكانیش بریتین لە، بەرهەمەكە هی ساڵانی 2020 بۆ 2025 بن و  لە 40 دەقیقە زیاتر نەبن و چیرۆكی فیلمەكانیش لەچوارچێوەی مەرگەساتی  ئەنفال و جینۆساید دابن".

رۆژی 14/4 یادی مەرگەساتی ئەنفالە كە ساڵێك لەگەرمیان و ساڵێك لە چەمچەماڵ بەڕێوەدەچێت، هەرچەندە ئەمساڵ یادەكە لە كەلارە، بەڵام بەهۆی بوونی مۆنیومێنتی ئەنفال لەچەمچەماڵ ئەمساڵ بەشێك لەیادەكە لەچەمچەماڵ بەڕێوەدەچێت.

PUKMEDIA