رژێم له ‌بالیسانه‌وه‌ ده‌ستی به ‌كیمیابارانی كورد كرد

PUKMEDIA

مەزاری ئەنفالکراوان

رۆژی 16ی 4ی 2024 یادی 37 ساڵه‌ی كیمیابارانكردنی بالیسان و شێخ وه‌سانانه‌ كه‌ بۆ یه‌كه‌مجار رژێمی به‌عس چه‌كی كیمیایی قه‌ده‌غه‌كراوی ‌‌نێوده‌وڵه‌تیان ‌دژ به‌خه‌ڵك و دانیشتوانی كورد به‌كاریهێناو به‌هۆیه‌وه‌ 263 هاووڵاتی بێ تاوان شه‌هیدكران و 620یش بریندار بوون.

37  ساڵ به‌ر له‌ئێستا، رژێمی به‌عسی ره‌فتار فاشی به‌بێ ره‌وچاوكردنی یاساو رێسا نێوده‌وڵه‌تیه‌كان، به‌ به‌رچاوی هه‌موو وڵاتانی جیهان كه‌ به‌ڵگه‌ی بێ مۆڕ‌اڵی و بێ په‌روایی سیاسه‌تی نێوده‌وڵه‌تی ئه‌وكاته‌ بوو، گه‌وره‌ترین تاوانی ده‌رهه‌ق به‌خه‌ڵكی سڤیلی دۆڵی بالیسان و گونده‌كانی خۆشناوه‌تی ئه‌نجامدا.

دوای په‌لامارو هێرشی سه‌ربازی بۆ سه‌ر خه‌ڵك و هێزی پێشمه‌رگه‌ی كوردستان به‌ 12 فڕ‌ۆكه‌ی جه‌نگی و به‌گازی خه‌رده‌ل و سیانید بۆردومانی شێخ وه‌سانان و دۆڵی بالیسانیان كردو بۆ یه‌كه‌مینجار چه‌كی كیمیایی قه‌ده‌غه‌كراوی ‌‌نێوده‌وڵه‌تیان ‌دژ به‌خه‌ڵك و دانیشتوانی كورد په‌روه‌رو شۆڕ‌شگێرو خه‌باتگێڕ‌ی ئه‌و سنووره‌ به‌كارهێنا.

به‌هۆی بۆردومانه‌كه‌ی رژێمی ئه‌وكاته‌ی به‌عسه‌وه‌ به‌چه‌كی كیمیایی 263 هاووڵاتی بێ تاوان شه‌هیدكران و 620 كه‌سی دیكه‌ش بریندار بوون و 72 كه‌ڵه‌ پیاوی جوامێرو تێكۆشه‌ریشیان شوێن بزر كران.

ڕ‌ۆژی كیمیابارانكردنی ناوچه‌ی "شێخ وه‌سان و بالیسان" كه‌ ڕ‌ژێمی به‌عس ئه‌نجامیدا، به‌ ڕ‌ۆژی ژینگه‌ی كوردستان دیاریكراوه‌و هه‌موو ساڵێك له‌م رۆژه‌دا چه‌ندین چالاكی ژینگه‌یی ئه‌نجامده‌درێت.
PUKMEDIA