کوردایەتی واتا حزبایەتی

ستران عەبدوڵڵا

بەشی نۆزدەهەم

پەیمانگە و مەدرەسەی حزب
حزب دەتوانێت لە چوارچێوەی چەتری مەدرەسەی حزبدا پتر لە پەیمانگەیەکی کادیران بۆ پێگەیاندن و دروستکردنی کادیر دابنێت کە ببێتە بەشێک لە چەتری ناوەندی و پێکەوە گرێدراو. ئەوەش بە گوێرەی توانا و پێداویستی حزبەکە، بۆ ئەوەی خوێندنگەی پێگەیاندنی حزبی گشتگیر و بەردەوام بێت، دەکرێ بە هەردوو ئاراستەی ئاسۆیی و ستوونی پۆلین بکرێت.

-خوێندنگەی حزبی سەرەتایی بۆ قۆناغ و ناونیشانی حزبی دیاریکراو (تا پلەی ئەندام کەرت یان ئەندام کۆمیتە).

-خوێندنگەی حزبی تایبەتمەند بە گوێرەی توانا و لێهاتوویی کادیر کە لە قۆناغی سەرەتایی و گشتی پێگەیاندنەوە بچێتە تایبەتمەندی و پسپۆڕی (پسپۆڕی هەڵبژاردن، پسپۆڕی ئیدارە و حوکمڕانی و شارەوانی، پسپۆڕی میدیا و خەباتی دیموکراتی و ... هتد.
-خوێندنگەی حزبی باڵا بۆ ناونیشانە حزبیەکانی تا پلەی سەرکردایەتی.

زۆر گرنگە تۆرێکی ورد و هەرەمی ئەم خوێندنگە حزبیانە پێکەوە گرێبدات، بەشێکی خاڵبەندی پێدانی ناونیشان و پلەی حزبی پەیوەست بکرێت بە هاندانی تەواوکردنی خوێندنی حزبی و تەنانەت بۆ هەندێک ناونیشانیش بکرێتە مەرج. ئەمەش بۆ پایەدارکردنی رۆشنبیری و هۆشیاری سیاسی.

-هەرەمی خوێندنگەی حزبی دەتوانێت ئەرکی ئەوەش بگرێتە ئەستۆ کە لیستی جیاجیای خۆپێگەیاندنی رۆشنبیری سیاسی و فیکری گشتی کادیر و هەڤاڵان دیاری بکات. بۆ ئەوەی هەردوو بوار (خۆ پێگەیاندنی گشتی و خۆ رۆشنبیرکردنی سیاسیی و فیکری) لەگەڵ بەرنامەی پێگەیاندنی کادیران یەک بگرێتەوە و هەنگاو بەرەو یەکێتی و یەکڕیزی فیکریی حزب بنرێت.

دوو تێبینی گرنگن وەکو قفڵی ئەم باسە

‌باشتر وایە بژاردەی خوێندنگەی حزبی جێگیر و بەردەوام بێت و تەنانەت راسپاردە و بڕیاری کۆنگرەکانیش، کە تایبەتن بەم بوارە، هەر لەو چوارچێوەیەدا بخولێتەوە.

بەرنامەکە پەرەپێبدرێت و فراوان بکرێت، نەک تووشی شڵەژان و دەستکاری بکرێت.

-پەیوەست بەو بوارەش: حزب هاندەری ئەم جێگیری و بەردەوام و ناوەندییە بێت لە کایەی خوێندنگەی حزبی و دەستبەرداری خولی لاکۆڵان و  پەرتەوازە و بێ سەروبەر بێت، کە وەکو خولی پەلە و بە هەڵپەی پێگەیاندنی پۆلیس و حەس حەس وایە و هیچ ئەزموونێکی پێگەیاندنی لێ شین نابێت.

بێگومان ئەم باسە وردەکاری زۆر هەڵدەگرێت کە دەتوانرێت بەتایبەتی و بە نەخشەی ناوخۆیی حزبی ئیشی لەسەر بکرێت، وەکو لیستی کتێبەکان، نەخشەی خول و مەشق و پەیمانگەکان و ناونیشانی کتێبەکان.

قسەکردن لەسەر رۆشنبیری سیاسی و فیکری بۆ خەبات، چوونە قوڵایی زیاتر هەڵدەگرێت گرنگترینیان ئەوەیە باشترین ویقایە و خۆپارێزییە لە لادانی حزبی و دواکەوتن و گروپسازی و هەموو نەریتەکانی کە هی پێش سەردەمی تەشکیلات و تەنزیماتە، کە هیچ پەیوەندیان بە حزبایەتییەکی رێک و پێک و مۆدێرنەوە نییە.

درێژەی هەیە