سەركەوتن بەرھەمی یەکڕیزییە

هـەرێم کەمال ئـاغا

دەست خۆش سەرۆك بافڵ ، هەموو هەوڵەکانت جێگەی ئومێدی خەڵکی کوردستان و عیراقە ، وەك درێژەپێدەری ڕێچکە و میراتی زیندووی سەرۆك مام جەلال.

لەدوای کۆبوونەوەی نێوان مەکتەبی سیاسی یەکێتی و پارتی بەئـامادەبوونی  هەریەك لەبەرێزان کاك مەسعود بارزانی و  کاك بافڵ تاڵەبانی دوایی لێك گەیشتن و راسپاردن   ، وەفدی هاوبەش بە سەرۆكایەتی كاك بافڵ سەردانیی بۆ بەغدادو  وکۆبوونەوەکانی لەگەڵ بەڕێزان فایەق زێدان سەرۆکی ئەنجومەنی باڵای دادوەری  و بەرێز سەرۆكی ئەنجومەنی وەزیران  محمد شیاع سودانی ، کێشەی مووچەی مووچەخۆرانی ھەرێمی  كوردستان چارەسەرکرا.

ئـەم هەنگاوە دەرخەری یەکڕیزی نێوان ھێز و لایەنە سیاسیەکانی ھەرێمی کوردستانە ، یەکڕیزی و یەکگوتاری کورد لەھەموو قۆناغەکان ، کاریگەری ڕاستەوخۆی لەسەر ھێز و پێگەی کورد و نوێنەرانی کوردستان بووە و دەبێت.

ھەوڵی دیپلۆماسی  سەرۆك بافڵ  پردێکی بەھێزبوو  بۆ  لێكتێگەیشتن

ھەوڵە دیپلۆماسیە بەردەوامەکانی سەرۆك بافڵ بۆ بەغدا لەڕابردوو و لە ئـێستادا ، بە سیاسەت و تێڕوانینە نوێیەکانی پردێکی بەھێزبوون  بۆ لەنزیكەوە لێكتێگەیشتن لە نێوان حکومەتی ھەرێم و ناوەندەكانی بڕیار لەبەغدا ، یەکێتیی نیشتمانیی کوردستان ھەمیشە پشت ئـەستوور بە بناغە نەگۆڕەکانی یەکڕیزی و ئـاشتی و تەبایی لەنێو خۆی ھەرێم و عیراق وگۆڕانکاریەکانی ناوچەکەدا ،گەڕانەوە بۆ سەرمێزی گفتوگۆ وچەسپاندنی دیموکراسیەتی ڕاستەقینە بە کلیلی چارەسەرکردنی ھەموو کێشەکان دەزانێت .

لەدوای پرۆسەی ئازادیەوە ، هـەمیشە ڕامانگەیاندووە کە چەقی چارەسەرکردنی کێشەکان ، دواجار گەڕانەوەیە بۆ بەغدا ، نەوەکو وڵاتانی تر .

بۆیە گرنگە یەکڕیزی لایەنە سیاسیەکان ببێتە سەرقافڵەی چارەسەرکردنی یەکجارەکی نیشتمانیی هەموو  کێشەکانمان ، لەسەر بنەمای دەستور و  بەرژەوەندی گشتی لەحکومەتی ئیتیحادیدا ، بێگومان کاری ھاوبەشی ھەردوو تیمی یەکێتیی و پارتی دەریخست پێکەوەبوونمان حکومەتی ھەرێم بەھێزتر دەکات و سەنگ و قورسایی و یەک دەنگی کورد ھەمیشە چارەسەری کێشەکان بەئـاراستەیەکی دەستوری دەبات .

یەکڕیزی ببێتە ئـامانج وستراتیژێکی نوێ

 وەك چۆن بە یەکڕیزی  توانرا کێشەی مووچەی مووچەخۆران چارەسەربکرێت ، پێویستە ئـەمە ببێتە ئـامانج وستراتیژێکی نوێ بۆ چارەسەرکردنی کێشە ھەڵپەسێردراوەکانی تری نێوان حکومەتی ھەرێم و حکومەتی ئیتیحادی ، بەتایبەت پرسی ناوچە کێشە لەسەرەکان ومەلەفی نەوت لەچوارچێوەی قانونی نەوت وگاز و داھاتەکانی نەوت و داهاتەکانی دیکە ، چونکە لێکتێگەیشتن و تەبایی ھەمیشە ھەوێنی چارەسەرکردنی کێشەکان دەبێت.

سەنگەری خەباتی ئـەمڕۆ دیالۆگ و خوێندنەوەی پێشھاتەکان و ئیدارەدانی ململانێ سیاسیەکانە ، ئەمجارەیان دوای ئەم دووریەی نێوانیشیان ، یەکێتیی و پارتی ڕۆلی کاریگەریان ھەبوو لەسەر ئـاراستەکردن و چارەسەرکردنی پرسی مووچەدا ، سەرەڕای بەرزنرخاندنی ڕوڵی ئـۆپۆزیسیۆنی  ڕاستەقینە ، بەڵام هەندێ هێزی بچوكی تازە دروستکراو ، بەبێ خوێندنەوەو ڕێزگرتن لە هەست و دەروونی کۆمەڵانی خەڵك ، ڕوماڵی میدیایی پڕ لە تەشھیرکردن ، پەیامی ناڕاستیان بڵاو دەکردەوە  کەھیچ خزمەتێك نە بەئێستاو بەداھاتوو ناکەن.

هەر وابووە ، زمانی  تەشھیرکردن ناتوانێ سەقامگیریی و  پێکەوەژیانی نێوان کۆمەڵانی خەڵکی کوردستان تێك بدات چونکە یەکێك لەشانازییەکانی گەلەکەمان لێبوردەیە  ، بۆیە بەباکردنی کەونەکا ، خزمەت بە خەڵك ناکات ، دوای هەموو قەیران و نەهامەتیەکانیش ،جەماوری كوردستان بەتایبەتی ئەم ساڵ شتەکان باشتر دەخوێنێتەوەو دەزانێت ئـەم قۆناغە پێویستی بەوەیە ئـەو ئـاسایش و ئـارامیەی ھەیە ببێتە ھەوێنی یەکجارەکی تەبایی نێوان سەرکردایەتی سیاسی کوردستان .

حکومەتی ھەرێم ھەوڵی  جددی  بدات  بۆ  حوکومڕانیەکی تەندروست

پشوودرێژی خەڵکی کوردستان ، پەیوەندی  بە مێژووی پڕ سەروەری و ماڵوێرانی و قوربانیدانی ڕۆڵەکانی خۆیەتی ، بۆیە سەبرو ئارامی گرت و ڕۆژە ناخۆشەکانیشی تێپەڕاند ،  بۆیە دەبێ حکومەتی ھەرێم ھەوڵی بەپەلەو جددی تر بدات ، بۆ  ھەنگاونان بەرەو حوکومڕانیەکی تەندروست ئـیدارەدانێکی ڕاست دروست بۆ وەڵامدانەوەی داخوازییەکانی خەڵکی کوردستان و خزمەتکردنیان .

PUKMEDIA