بەرەو كۆنگرەی پێنجەمیین

سەرکەوت زەکی

سەركەوت زەكی*

 
پێدەچێت ساڵی (٢٠٢٣) ساڵی وەرچەرخان و بنیاتنانەوە گرنگەكانی (ی.ن.ك) بن، نەك بڕیاردان بگرە تەنها بیركردنەوەش لەبەستنی پێنجەمین كۆنگرە ، دەربڕینی بوێرییەكی شۆڕشگێڕانەی یەكێتییانەیە، هەمان ئەو بوێری و ئازایەتیەیە كەسەرۆك مام جەلال لە ڕۆژانی هەرەسدا یەكێتی پێ دروستكردوو و هەمان ئەو هزر و نەترسیەیە كە شۆڕشێكی نوێی پێ هەڵگیرساند.

لە مێژوی خۆیدا، یەكێتی هێزێكی داهێنەری بە جورئەتی شۆڕش بووە، هەر ئەمەش لە (١٦) ساڵی تەمەنی كاری ڕێكخراوەییدا گەیاندییە لوتكەی سەركەوتن ، بەڵام بێگومان هێزێكی بێ هەڵەی بێ كەمتەرخەمیش نەبووە، بۆیە هەر كاتێك جڵەوی ڕەوتە شۆڕشگێڕییەكەی خۆی لە ناوخۆ و دەرەوە شل كردبێت، زیانی بە خۆی و ڕەوتە سیاسیەكەی و بە كۆمەڵگە و ئاستە جیاوازەكانی  بەرەوپێشبردنیشی گەیاندووە.

ساڵانێكی كەمە، دوای تەمەنێك لە داكشان، هەنگاوەكانی بەرەو چاكسازی نێوخۆیی، خۆتوندكردنەوەو و نوێبوونەوە دەنێت، بۆ تێپەڕاندنی ئەو قەیرانانەی هەم خۆی گرفتار كردوو هەم كۆمەڵی كوردەواریشی توشی ئاستەنگ كرد.

لەچوارچێوەی وتارێكدا نامەوێت ئاوڕ لە تەواوی ئەوبڕگە و جومگانە بدەمەوە كە ئەستەمە لە دوو توێی دوو كەوانەدا وەك مێژوو بیان نووسمەوە، بەڵام بەلامەوە گرنگە ئەوە بڵێم هەركاتێك (ی.ن.ك) لە ڕیفۆرمی نێوخۆی و سیاسەتی جەماوەری دروست  و ڕەوتی شۆڕشگێڕانە دوور كەوتبێتەوە، بە دیوێكی تردا جڵەوەكەی بۆ ڕەوتی كۆنسەر ڤاتیستی ناو كۆمەڵ شلكردبێت، هەمووان پێكەوە باجی گەورەمان داوە بۆیە لە ساتە وەختێكدا، لەبەر دەم دوو هەڵبژاردن و كێشە گەورەكانی عێراق و هەرێم داین، بڕیاری بەستنی كۆنگرە دەمانگەڕێنێتەوە بۆ بوێرییەكانی چركە ساتەكانی بڕیاردان له دامەزراندنی (ی.ن.ك) و هەڵگیرسانەوەی شۆڕشی نوێ.

ئەمان گەیەنێتەوە ئەو بڕوایەی كە یەكێتی هێزی ئیرادەی خەڵك و هێزی بڕیارە قورسەكانە. یەكێتییەكان حیزبەكەیان وەك كەرەستەیەك بۆ سەرخستنی قەزیە گەورەكەیان دەوێت و بۆ ئەوە قوربانیش دەدەن و ڕیفۆرم دەكەن و بڕیاری شۆڕشگێڕانەیان پێدەدرێت.

هەموو پێشبینی و خوێندنەوەكان، بەو ئاڕاستەیەن ئەم كۆنگرەیە دەبێتە كۆنگرەی بنیاتنانەوەی یەكێتی و دەبێته هێمای تێپەڕاندنی ئاستەنگی ناوخۆیی و ڕووكردنەوە خەڵك و جەماوەر، ئیتر بەهەموو لایەك دەڵێت یەكێتی قۆناغی داكشانی خۆی تێپەڕاند،  هەرچەندە ئەوە دوو ساڵێكە لەسەر ڕاستە ڕێگاكە هەنگاو دەنێت، بەڵام هەنگاوەكانی هەستانەوە و ڕوو لە هەوراز كردن و سەركەوتنەوەی خۆی بەم كۆنگرەیە خێراتر دەكات، پێكەوە بنیاتنانەوە و هەستانەوە بۆ خزمەتی كۆمەڵانی خەڵك دەست پێدەكاتەوە.
 
*لێپرسراوی مەكتەبی ڕێكخستنی (ی.ن.ك)

PUKMEDIA