حاكم قادر په‌یامێك ئاڕاسته‌ی مامۆستایانی ئاینی ده‌كات

یه‌كێتیی هه‌میشه‌ به‌چاوی رێزه‌و له‌ هه‌وڵ و ماندوبوونی مامۆستایانی روانیه‌

ئه‌مڕۆ 26-11-2015 حاكم قادر حه‌مه‌جان كارگێڕی مه‌كته‌بی سیاسیی ی.ن.ك به‌ ئاماده‌بوونی حامیدی حاجی غالی ئه‌ندامی سه‌ركردایه‌تی و لێپرسراوی مه‌كته‌بی كۆمه‌ڵایه‌تی له‌باره‌گای مه‌كته‌بی سیاسیی له‌سلێمانی له‌گه‌ڵ ژماره‌یه‌ك له‌ وتاربێژ و مامۆستایانی ئایینی سنووری پارێزگای سلێمانی كۆبووه‌وه‌.

له‌كۆبوونه‌وه‌كه‌دا حاكم قادر له‌ وته‌یه‌كدا رۆڵی مامۆستایانی ئایینی و ته‌ریقه‌ت و ناوه‌نده‌كانی په‌روه‌رده‌ی ئایینی له‌ نێوكۆمه‌ڵگه‌ی كورده‌واری و هه‌روه‌ها پشتیوانیكردنیان له‌ شۆڕه‌شه‌كانی گه‌لی كورد به‌رزنرخاند، ئاماژه‌ی به‌وه‌دا ئه‌مڕۆ گروپه‌تیرۆریستییه‌كانی له‌نموونه‌ی داعش به‌ناوی ئایینی پیرۆزه‌ كوشتار و پاكتاوی پێكهاته‌ و ئایینه‌كانی دیكه‌ ده‌كه‌ن و وتی: ئه‌ركی مامۆستایانی ئایینییه‌ كه‌ رێگه‌ به‌و كاره‌ نامرۆڤانه‌ نه‌ده‌ن و ئیدانه‌یان بكه‌ن و بۆ خه‌ڵكی روون بكه‌نه‌وه‌ كه‌ كاری ئه‌و گروپانه‌ دووره‌ له‌به‌های مرڤایه‌تی و ئایینی ئیسلام.

 وتیشی: به‌ره‌نگاربوونه‌وه‌ی تیرۆرستان وێڕای رووبه‌ڕووبوونه‌وه‌ی قاره‌مانانه‌ هێزی پێشمه‌رگه‌، هاوكات پێویستی به‌ به‌ره‌نگاریی بیری توندره‌ویی و وشككردنی سه‌رچاوه‌ی دارایی و پشتیوانیكردنیانه‌وه‌ هه‌یه‌ و بۆ ئه‌وه‌ش ئه‌ركی مامۆستایانی ئایینیشه‌ كه‌ به‌ره‌نگاریی فكری توندڕه‌ویی ببنه‌وه‌.

وتیشی: یه‌كێتی هێزێكه‌ باوه‌ڕی ته‌واوی به‌ ئازادی هه‌یه‌ به‌ ئازادی باوه‌ڕی ئایینی و ئازادی باوه‌ڕیشه‌وه‌ و رونیشیكرده‌وه‌، پێشمه‌رگه‌ به‌وپه‌ڕی قاره‌مانییه‌وه‌ به‌ره‌نگاریی داعش بوونه‌ته‌وه‌ و له‌سه‌ركه‌وتنی به‌رده‌وامدان و تیرۆریستانی داعش شه‌ڕێكی سه‌پێنراویان رووبه‌ڕووی گه‌له‌كه‌مان كردوه‌ته‌وه‌ و پێشمه‌رگه‌ش به‌وپه‌ڕی قاره‌مانێتی و به‌رپرسیاریی نیشتمانییه‌وه‌ خاك و گه‌له‌كه‌مان ده‌پارێزن.

له‌ته‌وه‌رێكی تردا كارگێڕی مه‌كته‌بی سیاسیی باسی له‌دۆخی ناسه‌قامگیری سیاسیی و حوكمڕانی له‌هه‌رێم كردو رونیكرده‌وه‌، یه‌كێتی هه‌میشه‌ له‌به‌ره‌ی خه‌ڵك و میلله‌تدابووه‌ و داكۆكی ته‌واو له‌ ماف و خواسته‌كانیان ده‌كات و داكۆكیكاریشه‌ و وتی: یه‌كێتی له‌ هه‌وڵ و هه‌نگاوه‌كانی چاره‌سه‌ر به‌رده‌وامه‌ و له‌گه‌ڵ لایه‌نه‌ سیاسییه‌كان له‌ كۆبوونه‌وه‌دایه‌ و له‌گه‌ڵ پارتی و گۆڕاندا و كۆمه‌ڵ و یه‌كگرتوودا كۆبوه‌ته‌وه‌ وپێشنیازی خۆی پێشكه‌شكردوه‌ بۆ نزیككردنه‌وه‌ی بۆچوونه‌كان و دۆزینه‌وه‌ی چاره‌سه‌ر.

لایخۆشییه‌وه‌ حامیدی حاجی غالی دووپاتیكرده‌وه‌، كه‌ یه‌كێتیی هه‌میشه‌ به‌چاوی رێزه‌و له‌ هه‌وڵ و ماندووبوونی مامۆستایانی روانیه‌وه‌ و داوایكرد كه‌ رۆڵیان هه‌بێت له‌هۆشیاركردنه‌وه‌ی خه‌ڵك له‌بیری توندره‌وی وتیرۆرستان و نه‌هێڵن به‌ناوی پیرۆزی ئیسلامه‌وه‌ تاوانكاری ئه‌نجامبدرێت.

له‌به‌رامبه‌ردا وتاربێژ و مامۆستایانی ئاینی پشتییوانیان بۆ هه‌وڵه‌كانی یه‌كێتی بۆ چاره‌سه‌ری كێشه‌ و قه‌یرانه‌ سیاسییه‌كانی هه‌رێم دووپاتكرده‌وه‌ و روونیان كرده‌وه‌ كه‌ یه‌كێتی هه‌میشه‌ رۆڵی باڵای هه‌یه‌ و هه‌بووه‌ و هێزێكی خزمه‌تگوزاره‌ و هه‌میشه‌ داكۆكیكار و خه‌مخۆری خاك و میلله‌ته‌كه‌مانه‌ و به‌ر له‌هه‌موان ، مێژوو شاهیدی هه‌ڵوێست و به‌رپرسیارێتییه‌كانی یه‌كێتییه‌ و خوشحاڵیشیان بۆ سه‌ركه‌وتنه‌كانی هێزی پێشمه‌رگه‌ به‌سه‌ر تیرۆریستاندا دووپاتكرده‌وه‌ و ئاماژه‌یان به‌وه‌دا شه‌هیده‌كان جێگه‌ی سه‌ربه‌رزی نه‌ته‌وه‌كه‌مانن.

 رونیشیان كرده‌وه‌ كه‌ به‌ره‌نگاری داعش پێویستی به‌ شه‌ڕی فكر هه‌یه‌ و هه‌رچییه‌كیان پێ بكرێت درێغی ناكه‌ن و رێگه‌ ناده‌ن به‌ناوی خوداو ئاینی پیرۆزه‌ و رۆڵه‌ی كورد بكوژن و ئاشته‌وایی و پێكه‌وه‌ژیانی مێژوویی له‌كوردستان بشێوێنن.

PUKmedia راگه‌یاندنی كارگێڕی مه‌كته‌بی سیاسی