بافڵ تاڵەبانی:یەكێتی بەهەمان رۆحییەت و روئیای نیشتمانیانەی مام كاردەكات

.

بافڵ تاڵەبانی، هاوسەرۆكی یەكێتیی نیشتمانیی كوردستان بەیاوەری ژمارەیەك لەئەندامانی مەكتەبی سیاسی و سەركردایەتی سەردانی مەڵبەندی رێكخستنی بەغدای یەكێتی كرد و لایەن رابیحە حەمەد، لێپرسراو و ئەنجوومەنی مەڵبەند بەگەرمی پێشوازی لێكرا.

لە كۆبوونەكەدا بافڵ تاڵەبانی ئامانجی سەردانەكەی بۆ بەغدا و گرنگی كۆبوونەوەكانی چەند رۆژی رابردووی بۆ ئەندامانی یەكێتی لە بەغدا روونكردەوە گفتوگۆی لەبارەوە كرا و وەڵامی سەرنج و پرسیارەكانی ئەندامانی مەڵبەندی دایەوە.

لەبارەی هەڵوێست و ستراتیژی یەكێتییەوە هاوسەرۆك رایگەیاند: یەكێتی بەهەمان رۆحییەت و روئیای نیشتمانییانەی مام جەلالەوە كاردەكات و هەڵگری رێبازی چەپكە گوڵەكە دەبێت. بڕوای تەواومان بە كاری پێكەوەیی و هاوبەش هەیە و پێشوازی لە هەر هەوڵێك دەكەین كە خزمەت بە بەرژەوەندییە باڵاكانی گەلەكەمان بكات. دەرگامان بۆ هەر هێز و لایەنێك كراوەیە كە بیەوێت پێكەوە لەپێناو كوردستان و خەڵكە خۆشەویستەكەی كاربكەین.

بافڵ تاڵەبانی ئاماژەی بە گرنگی و پێگەی سیاسی یەكێتی لە بەغدا كرد و وتی: چالاكییە سیاسی و دیبلۆماسییەكانمان لە بەغدا زیاتر دەكەین، چونكە بڕوامان بەوەیە ئەگەر بمانەوێت مافی گەلەكەمان و كێشەكانمان لەگەڵ ناوەند لەسەر بنەماكانی دەستوور جێبەجێبكەین، دەبێت چالاكانەتر كاربكەین و لەگەڵ دۆستەكانمان بەردەوام لەپەیوەندیدابین لەپێناو پاراستنی بەرژەوەندییە باڵاكان. بۆ ئەوەش مەڵبەندی یەكێتی راسپارد درێژە بەسیاسەتی هاوبەشی بدەن لەگەڵ هەموو هێز و نەتەوە و پێكهاتە جیاجیاكانی بەغدا و لەهەماهەنگی بەردەوامدابن بۆ جێبەجێكردنی خواستەكانی خەڵكی كوردستان.

یەكڕیزی و یەكدەنگی گەلی كورد تەوەرێكی تری كۆبوونەكەوە بوو و هاوسەرۆك رایگەیاند: یەكێتی هەمیشە بڕوای بە دیالۆگ و لێكتێگەیشتن هەبووە و ئاماژەی بەڕۆلی یەكێتی كرد لەچارەسەركردنی كێشەكانی نێوان هەولێر و بەغدا و وتی، دەبێت پەرە بەو پەیوەندییە مێژووییە بدەین كە سەرۆك مام جەلال بەردی بناغەی داناوە، بەهەمان رۆحییەت لەگەڵ دۆستەكانمان بەردەوامبین و وەك هەمیشە یەكێتی دەبێت مەرجەع  و خاڵی كۆكەرەوەی جیاوازییەكان بێت. لەپێناو گەلەكەمان درێژە بەخەباتی نیشتمانی خۆمان بدەین و بەهیچ شێوەیەكیش سازش لەسەر هێڵە گشتی و ستراتیژییەكانمان ناكەین تەنها لەسەر مافی كورد و بەرژەوەندی گەلەكەمان نەبێت كە ئەمەش شانازی یەكێتیبوونمانە لەهەموو قۆناغەكانی خەباتدا.

PUKmedia