سەرۆك كۆمارو وەفدی هەرێم:كۆتایی بەقەیرانی مووچەو بژێوی خەڵك بهێنرێت

.

سەرۆك كۆمار سەبارەت بەپرسی بودجەو مووچەی مووچەخۆرانی هەرێمی كوردستان لەگەڵ قوباد تاڵەبانی و فراكسیۆنە كوردستانییەكان كۆبووەوە.

لەكۆبوونەوەكەدا جەختكرایەوە لە گرنگی چارەسەركردنی كێشە هەڵپەسێردراوەكان و گەیشتن بەڕێگاچارەی بنەڕەتی و كۆتایی لەسەر بنەمای دەستوورو یاسا و پاراستنی بژێوی ژیانی سەرجەم هاووڵاتیانی عیراق و هەرێمی كوردستان و مووچەی مووچەخۆران دوور لە ململانێ سیاسییەكان.

ئەمڕۆ 15ی 2ی 2021  د.بەرهەم ساڵح، سەرۆك كۆماری عیراق لە بەغدا پێشوازیكرد لە قوباد تاڵەبانی، جێگری سەرۆك وەزیرانی هەرێمی كوردستان و سەرۆكی وەفدی دانوستانكاری حكومەتی هەرێم بۆ بەغداو سەرۆكی فراكسیۆنە كوردستانییەكان، بەئامادەبوونی بەشیر حەداد، جێگری دووەمی سەرۆكی پەرلەمانی عیراق و فوئاد حسێن، وەزیری دەرەوەی عیراق و سەبارەت بە دواین گۆڕانكارییەكانی دانوستانی نێوان حكومەتی هەرێمی كوردستان و حكومەتی فیدراڵ و چارەسەركردنی كێشە هەڵپەسێردراوەكان گفتوگۆكرا.

لەسەرەتای كۆبوونەوەكەدا ئامادەبووان پرسەو هاوخەمی خۆیان راگەیاند، بەبۆنەی كۆچی دوایی د.رۆژ نوری شاوەیس، ئەندامی مەكتەبی سیاسی پارتی دیموكراتی كوردستان و خەباتكاری بە ئەزموون و كەسایەتی ناسراوی كوردستان.

لەكۆبوونەوەكەدا جەختكرایەوە لە گرنگی چارەسەركردنی كێشە هەڵپەسێردراوەكانی نێوان هەردوو حكومەتی هەرێمی كوردستان و حكومەتی فیدراڵ و گەیشتن بەڕێگاچارەی بنەڕەتی و كۆتایی لەسەر بنەمای دەستوور و یاسا و پاراستنی بژێوی ژیانی سەرجەم هاووڵاتیانی عیراق و هەرێمی كوردستان و مووچەی مووچەخۆران دوور لە ململانێ سیاسییەكان.

لە تەوەرێكی دیكەی كۆبوونەوەكەدا بەگرنگییەوە باس لە پاراستنی پشكی هەرێمی كوردستان كرا لەبودجەی گشتی ساڵی 2021 و زامنكردنی مافی تەواوی ناوچەو پێكهاتەكان لەسەر بنەمای دادپەروەری و پاراستنی مافی سەرجەم هاووڵاتیان و پێویستی كۆتایی هێنان بەقەیرانی مووچە و بژێوی ژیانی خەڵك و كەمكردنەوەی لێكەوتە داراییەكان لەسەر هاووڵاتیان. 

PUKmedia راگەیاندنی سەرۆك كۆمار