سه‌رۆكی هه‌رێم: پێویسته‌ عیراق قه‌ره‌بووی كه‌سوكاری ئه‌نفالكراوان بكاته‌وه‌

.

سه‌رۆكی هه‌رێمی كوردستان له‌ساڵیادی ئه‌نفالی بادینان دا ده‌ڵێت، ده‌بێت حكومه‌تی فیدراڵی عیراق ئه‌ركی یاسایی خۆی و بڕیاری دادگای باڵای تاوانه‌كانی عیراق جێبه‌جێ بكات كه‌ شاڵاوه‌كانی ئه‌نفالی به‌ تاوانی دژی مرۆڤایه‌تی و جینۆساید و جه‌نگ ناساندووه‌ و قوربانییان و كه‌سوكاری ئه‌نفالكراوان له‌ هه‌موو ڕوویه‌كه‌وه‌ قه‌ره‌بوو بكاته‌وه‌.

ده‌قی بروسكه‌كه‌...

ئه‌مڕۆ به‌ ڕێز و شكۆوه‌ یادی قوربانییانی ئه‌نفالی بادینان ده‌كه‌ینه‌وه‌، دروود بۆ گیانی پاكی شه‌هیدان و سڵاو بۆ كه‌سوكاری سه‌ربه‌رزیان ده‌نێرین. له‌ به‌رده‌وامیی ئه‌و شاڵاوه‌ به‌دناوه و له‌ تاوانێكی دیكه‌ی دڕه‌نده‌دا، ساڵی 1988 ڕژێمی به‌عس (180) هه‌زار هاووڵاتیی كوردستانی هه‌ر له‌ گه‌رمیانه‌وه‌ تا بادینان بێ جیاوازی بێسه‌روشوێن و شه‌هید كرد و هه‌موو شوێنه‌وارێكی ژیانی له‌ هه‌زاران دێهاتی كوردستان سڕییه‌وه‌.

له‌ 25ی ئابه‌وه‌ تا 6ی ئه‌یلوولی 1988 له‌ دوا قۆناغه‌كانی ئه‌نفالدا زۆربه‌ی زۆری ناوچه‌كانی بادینان كیمیاباران كران و هه‌موو پێكهاته‌كانی خه‌ڵكی ناوچه‌كه‌ له‌لایه‌ن پێنج فیرقه‌ی سه‌ربازییه‌وه ڕووبه‌ڕووی گرتن و كوشتن و ڕاگواستن بوونه‌وه‌، مزگه‌وت و دێر و گونده‌كانی بادینان به‌ر شاڵاوه‌كه‌ كه‌وتن و وێران كران، ئه‌وانه‌ش كه‌ له‌ تاوانه‌كه‌ ڕزگاریان بوو، به‌ره‌و ئێران و توركیا و وڵاتان دی، ئاواره‌ و ده‌ربه‌ده‌ر بوون.

له‌م یاده‌دا دووپاتی ده‌كه‌ینه‌وه‌ ده‌بێت حكوومه‌تی فیدراڵی عیراق ئه‌ركی یاساییی خۆی و بڕیاری دادگای باڵای تاوانه‌كانی عیراق جێبه‌جێ بكات كه‌ شاڵاوه‌كانی ئه‌نفالی به‌ تاوانی دژی مرۆڤایه‌تی و جینۆساید و جه‌نگ ناساندووه‌ و قوربانییان و كه‌سوكاری ئه‌نفالكراوان له‌ هه‌موو ڕوویه‌كه‌وه‌ قه‌ره‌بوو بكاته‌وه‌، له‌ هه‌رێمی كوردستانیش خزمه‌تی زیاتری قوربانییانی ئه‌نفال و به‌دواداچوون بۆ چاره‌نووسی ونبووان بكرێت، هه‌روه‌ها به‌رده‌وام بین له‌ به‌دۆكیوومێنتكردنی تاوانه‌كان و هه‌وڵدان بۆ ناساندیان به‌ جینۆساید له‌سه‌ر ئاستی نێوده‌وڵه‌تی بۆ ڕێگریكردن له‌ دووباره‌بوونه‌وه‌یان له‌ هه‌ر شوێنێكی جیهان.

ده‌بێ یادی ئه‌نفال هانده‌ری زیاترمان بێت بۆ پته‌وكردنی ته‌بایی و یه‌كڕیزیی لایه‌ن و پێكهاته‌كانی كوردستان و ئه‌و لاپه‌ڕانه‌ی مێژوو پێویسته‌ ببنه‌ ھه‌وێنی لێبوورده‌یی و ئاشتی و پێكه‌وه‌ژیان و پاراستنی ده‌ستكه‌وته‌كانی كوردستان كه‌ ئه‌وه‌ش باشترین وه‌فادارییه‌ بۆ خوێنی شه‌هیدان. هه‌ر له‌م یاده‌دا سوپاس و پێزانینمان بۆ خه‌ڵكی هه‌ولێر و ده‌وروبه‌ری دووپات ده‌كه‌ینه‌وه‌ كه‌ به‌ هه‌موو شێوه‌یه‌ك هاوكاریی خه‌ڵكی لێقه‌وماوی بادینانیان كرد كه‌ له‌و شاڵاوه‌دا ڕاگوێزرانه‌ كه‌مپی زۆره‌ملێی جێژنیكان، جوامێری و مرۆڤپه‌روه‌رییان هه‌رگیز له‌بیر ناكرێت.

سڵاو له‌ گیانی پاكی شه‌هیدانی ئه‌نفال و ته‌واوی شه‌هیدانی كوردستان.

نێچیرڤان بارزانی

سه‌رۆكی هه‌رێمی كوردستان

PUKmedia راگه‌یاندنی سه‌رۆكایه‌تی هه‌رێم