سیمینارێك لەبارەی دۆخی كوردو سیاسەتی دەرەوەی یەكێتی بەڕێوەدەچێت

.

‎عیماد فەرهادی ئەندامی مەكتەبی پەیوەندییەكانی دەرەوەی یەكێتی نیشتمانی كوردستان لە ئینستیوتی كاروباری دەرەوەو بازرگانی سەر بە وەزارەتی دەرەوەی هەنگاریا سیمینارێكی لەبارەی دۆخی هەرێمی كوردستان و سیاسەتی ئەمڕۆی یەكێتی و قۆناغە جیاوازەكانی خەباتی كورد سازكرد.
‎

سیمینارەكە بە دەقیقەیەك وەستان بۆ گیانی پاكی سەرۆك مام جەلال و بەئامادەبوونی ژمارەیەك لە توێژەران و مامۆستایانی زانكۆی بوداپێست بەڕێوەچوو.
‎لە سەرەتای سیمینارەكە عیماد فەرهادی كورتەیەكی لەبارەی مێژووی شۆڕشەكانی كورد بەگشتی و شۆڕشی نوێی گەلەكەمان بەڕابەرایەتی یەكێتی نیشتمانی كوردستان خستەڕوو و باسی لەوە كرد كە لەسەرەتای دامەزراندنیەوە یەكێتی نیشتمانی كوردستان هەڵگری دروشمی مافی چارەی خۆنووسین بووەو لەوساوە تا ئێستا بەردەوامە لە خەبات بۆ گەیشتن بە ئاواتەكانی كورد.
‎

بەشێكی تری سیمینارەكە تەرخانكرا بۆ ڕۆڵی مام جەلال لەبنیاتنانی پەیوەندی دیبلۆماسی و داڕشتنی بنچینەی گونجاو بۆ دروستكردنی پەیوەندی دیبلۆماسی لەسەر ئاستی عێراق و هەرێمی كوردستان، لەمڕووەوە هەڤاڵ عیماد فەرهادی دووپاتیكردەوە كە مام جەلال خاوەنی دیدگایەكی ڕوون بووەو كاریكردووە بۆ ئەوەی پەیوەندییەكی دۆستانە لەگەڵ سەرجەم وڵاتان دروست بكاو پەرەی زیاتر بە ئازادی و دیموكراسی و مافی مرۆڤ بدا لە ناوچەكە.
‎

ئەنجامدانی ڕیفراندۆم و ڕووداوەكانی دوای ڕیفراندۆم تەوەری سەرەكی سیمینارەكە بوو، عیماد فەرهادی هۆكارو پاڵنەرەكانی ئەنجامدانی ڕیفراندۆمی بەوردی باسكردو ئاماژەی بەوەكرد كە گەلی كورد ساڵەهایە هەوڵی بەدەستهێنانی مافە نەتەوەیی و دیموكراسییەكانی خۆی دەدا و لەم پێناوەشدا لە ڕیفراندۆمی ٢٥ی ئەیلوول زیاتر لە %٩٢ ی خەڵكی كوردستان دەنگی بە بەڵێ بۆ سەربەخۆیی و مافی چارەی خۆنووسین دا، لەگەڵ ئەوەشدا هەرێمی كوردستان هێشتا دەیەوێ لەگەڵ عێراقێكی دیموكرات لەسەر بنەمای شەراكەتی ڕاستەقینە و جێبەجێكردنی دەستوور هاوبەش بێ.
‎

كۆتا تەوەری سیمینارەكە قۆناغی دوای ڕیفراندۆم و پەیوەندییەكانی نێوان هەرێم و بەغدا بوو، عیماد فەرهادی ئەندامی مەكتەبی پەیوەندییەكانی یەكێتی دیدگاو ستراتیژی یەكێتی نیشتمانی كوردستانی خستەڕوو و دووپاتی كردەوە كە یەكێتی هەڵگری دروشمی پێكەوەكاركردن و هەماهەنگی نێوان سەرجەم پێكهاتەو نەتەوە جیاوازەكانەو پێداگرە لەسەر ئەوەی كە دۆخی عێراق بەرەو باشبوون بچێ و دەستوور بكرێتە بنەمای سەرەكی كاركردن و هاووڵاتیان لە ململانێ سیاسییەكان نەوەگلێندرێن.
‎

لەكۆتاییدا بەگفتوگۆو پرسیارو وەڵامی ئامادەبووان سیمینارەكە كۆتایی هات و سەرجەم بەشداربووان هاوڕابوون كە دەبێ كورد لەهەرێمی كوردستان بایەخی زیاتر بە پەیوەندییە دیبلۆماسییەكان بدا.

PUKmedia  تایبەت
‎فۆتۆ هیمداد كەریم