ته‌رمی هاووڵاتییه‌ك دۆزرایه‌وه‌

.

به‌ڕێوه‌به‌رایه‌تی پۆلیسی راپه‌ڕین رایگه‌یاند، ته‌رمی هاووڵاتییه‌ك به‌ كوژراوی له‌ قه‌ڵادزێ دۆزرایه‌وه‌ و شوێنه‌واری چه‌قۆ به‌ جه‌سته‌یه‌وه‌ هه‌یه‌.

له‌ راگه‌یه‌ندراوێكدا كه‌ كۆپییه‌كی ده‌ست PUKmedia كه‌وتووه‌، به‌ڕێوه‌به‌رایه‌تی پۆلیسی راپه‌ڕین رایگه‌یاندووه‌، به‌یانی ئه‌مڕۆ دووشه‌ممه‌15-4-2019  ته‌رمی هاوڵاتییه‌ك به‌ناوی (س. ع. ئـ) له‌دایكبووی ساڵی 1969 پیشه‌ی كاسب، دانیشتووی گه‌ڕه‌كی خانه‌قای قه‌ڵادزێ گه‌یه‌ندرایه‌ نه‌خۆشخانه‌ی گشتی قه‌ڵادزێ كه‌ شوێنه‌واری چه‌قۆ به‌ جه‌سته‌یه‌وه‌ هه‌یه‌.

وتیشی: به‌ وته‌ی كه‌سوكاره‌كه‌ی، دوێنێ هاوڵاتییه‌كه‌ له‌ ماڵه‌كه‌ی چۆته‌ ده‌ره‌وه‌ و نه‌گه‌ڕاوه‌ته‌وه‌ و دواتر هێزه‌ ئه‌منیه‌كان له‌لایه‌ن كه‌سوكاری ئاگادار ده‌كرێنه‌وه‌ و ده‌ستبه‌جێ لێكۆڵینه‌وه‌ ده‌ستپێده‌كات، پاش به‌ده‌ستهێنانی زانیاری ورد هێزه‌كانی نوسینگه‌ی نه‌هێشتنی تاوانی پشده‌ر و بنكه‌ی پۆلیسی فریاكه‌وتن و بنكه‌ی پۆلیسی ڕاپه‌ڕین ته‌رمه‌كه‌یان دۆزیه‌وه‌.

باسی له‌وه‌ش كردووه‌: پاش كوشتنی تاوانلێكراو، ئۆتۆمبێله‌كه‌ی براوه‌ته‌ نزیك گوندی (گرده‌سپیان) به‌ دووری نزیك 15 كم له‌ شوێنی ڕووداو و له‌لایه‌ن هێزه‌كانی پۆلیس و ئاسایش به‌ سوتاوی دۆزراوه‌ته‌وه‌، دوای ڕووداوه‌كه‌ ده‌ستبه‌جێ تیمی لێكۆڵینه‌وه‌ی تاوانی پشده‌ر به‌ وردی پشكنینی بۆ ته‌رمی تاوانلێكراو و شوێنی ڕووداوه‌كه‌ كردووه‌، له‌ئێستاشدا ته‌رمه‌كه‌ له‌ پزیشكی دادوه‌ری قه‌ڵادزێیه‌.

به‌ڕێوه‌به‌رایه‌تی پۆلیسی راپه‌ڕین  باسی له‌وه‌شكردووه‌ "تاوانلێكراو باوكی شه‌ش كوڕه‌، دۆسیه‌ی لێكۆڵینه‌وه‌ بۆ ڕووداوه‌كه‌ كراوه‌ته‌وه‌ و لێكۆڵینه‌وه‌ش به‌رده‌وامه‌.

PUKmedia راگه‌یاندنی پۆلیسی راپه‌ڕین