باسى ته‌شكیلاتى سانى

.

باسى ته‌شكیلاتى سانى

× به‌گم تۆ له‌ حسابا زیره‌كى، كه‌ى حكومه‌ت ئه‌م قه‌رز و قۆڵه‌یه‌ى له‌كۆڵ ئه‌بێته‌وه‌؟
ـ ئینجا تۆ (چ) خه‌مێكته‌ رۆڵه‌؟!
× ئاخر بۆ شان و شه‌وكه‌تى میلـله‌ته‌كه‌مان جوان نى یه‌ قوربان.
ـ شه‌وكه‌ت ناناسم، به‌ڵام شانى هه‌موو میلـله‌تێ وایه‌... مه‌سه‌له‌ن تۆ ته‌ماشاى یۆنان بكه‌.
× ئه‌ویش قه‌رزاره‌؟
ـ ئه‌رێ وه‌ڵـڵا.. به‌و هه‌موو ته‌ئریخ و فه‌یله‌سوفه‌ نێره‌كه‌رانه‌وه‌، قوڕبه‌سه‌ره‌ تا بینه‌قاقاى له‌ قه‌رزایه‌، ئیتر ئێمه‌ چین؟!
× ئوستاز گیان یۆنان قه‌رزیش بكات له‌سه‌رى ئه‌خوات. ئه‌توانێ ساحێب قه‌رزه‌كه‌ قه‌ناعه‌ت پێ بكات.
ـ چۆن یه‌عنى؟!!
× چاك گه‌وره‌م.. كه‌ كابرا عه‌یب نه‌بێ هاته‌ سه‌رى و وتى بێنه‌ قه‌رزه‌كه‌م بده‌ره‌وه‌، ئه‌و ئه‌توانێ سوود له‌ فه‌یله‌سوفه‌كانى ببینێ.
ـ تێ ناگه‌م كه‌لـله‌پووت.. چۆن ئیستیفاده‌ له‌ فه‌یله‌سوفه‌كانى ئه‌كات؟
× ئاسانه‌ به‌گم.. به‌وپه‌ڕى سیقه‌وه‌ روو ئه‌كاته‌ خاوه‌ن قه‌رزه‌كه‌ و ئه‌ڵێ خوا ئه‌و ئیفلاتونه‌م لێ بسێنێ له‌ده‌ستما نى یه‌ ئه‌گینا ئائێستا دوا فلسیم ئه‌دایته‌وه‌.
ـ راست ئه‌كه‌ى.. یان ئه‌ڵێ به‌سه‌رى تۆ نا به‌سه‌رى به‌تلیمۆس كه‌ توركیا پاره‌كه‌ى بۆ ناردم یه‌كه‌م كه‌س قه‌رزه‌كه‌ى تۆ ئه‌ده‌مه‌وه‌.
× ره‌حمه‌ت له‌ دینت.. به‌ڵام ئێمه‌ى داماو كێمان هه‌یه‌ ئه‌وه‌نده‌ موهیم بێ بتوانین له‌ مه‌جلیسى ده‌وڵه‌تاندا سوێند به‌سه‌رى بخۆین و بڕوامان پێ بكه‌ن؟
ـ ده‌ كه‌واته‌ هه‌ڵیگره‌ بۆ دواى ته‌شكیلى حكومه‌ت.
× وه‌ڵـڵا مه‌گه‌ر واى لێ بكه‌ین.. كه‌ ساحێب قه‌رزه‌كه‌ هات ئه‌ڵێین داینێ بۆ ته‌شكیلاتى سانى.
ـ كوڕه‌ نه‌گبه‌ت هێواش باسى مه‌كه‌.
× باسى چى؟
ـ باسى ته‌شكیلاتى سانى.