هه‌ژار زه‌هاوی و گروپی موزیكی لوڕ به‌رهه‌مێكی نوێ تۆمارده‌كه‌ن

.

گروپی موزیكی لوڕ و هونه‌رمه‌ند هه‌ژار زه‌هاوی كاری كوێ به‌رهه‌م ده‌هێنن و له‌لایه‌ن كه‌ناڵی خاك تیڤی كاری كلیپی بۆ ده‌كرێت و له‌ ماوه‌یه‌كی نزیكدا پێشكه‌ش به‌ هه‌وادارانی موزیك ده‌كرێت.

له‌باره‌ی به‌رهه‌مه‌كه‌وه‌ نزار زێوێی سه‌رپه‌رشتیاری گروپی مۆزیكی لوڕ بۆ PUKmedia وتی: ئه‌م به‌رهه‌مه‌ یه‌كه‌م كاری تۆماركراوی هاوبه‌شی گروپی موزیكی لوڕ و هونه‌رمه‌ند هه‌ژار زه‌هاویه‌، كه‌پێك هاتووه‌ له‌ گفتوگۆیه‌ك له‌ نێوان ئامێره‌ ژێداره‌كان و ئامێره‌ ریتمیه‌كان، كه‌له‌ سێ جوڵه‌ پێك هاتووه‌و هه‌ر جوڵه‌یه‌ك تایبه‌تمه‌ندی خۆی هه‌یه‌ و ئامێرێكی ریتمی وه‌ك سۆڵۆ به‌كارهاتووه‌.

وتیشی: موزیكی به‌رهه‌مه‌كه‌ له‌لایه‌ن نزار زێوێی و گۆڤه‌ند عه‌بدوڵڵا ئاماده‌كراوه‌.

له‌باره‌ی ناوی به‌رهه‌مه‌كه‌شه‌وه‌ وتی، هێشتا ناومان لێنه‌ناوه‌، له‌م نزیكانه‌دا ناوێكی بۆ ده‌دۆزینه‌وه‌.

ئه‌وه‌شی خسته‌روو، كه‌ به‌رهه‌مه‌كه‌ له‌ ستۆدیۆی گروپی موزیكی لوڕ تۆماركراوه‌و هه‌ر خۆشی كاری میكس و ماسترینگی بۆ كردوه‌.

له‌باره‌ی كاركردنیش له‌گه‌ڵ هه‌ژار زه‌هاوی نزار زێوێیی وتی: ئێمه‌ له‌گه‌ڵ كاك هه‌ژار هاووڕێیه‌تیمان هه‌بوه‌و له‌باره‌ی كاری هونه‌ریه‌وه‌ گفتوگۆمان كردوه‌و بڕیاره‌مانداوه‌ كارێكی هاوبه‌ش بكه‌ین و وه‌ك نمونه‌یه‌كی جوان پیشانی دنیای بده‌ین و كارێك بكه‌ین له‌ئاست هونه‌ری جیهانی، بۆیه‌ ئه‌م به‌رهه‌مه‌ چه‌ند ریتمێكی جیاوازه‌ و هه‌ر ریتمێك پێناسه‌ی ناوچه‌یه‌كی وڵاته‌كه‌مان ده‌كات.

ئه‌وه‌شی ئاشكراكرد، كه‌له‌ داهاتوودا كاری هاوبه‌شی تریان له‌گه‌ڵ هه‌ژار زه‌هاوی ده‌بێت.

به‌شداروبانی موزیك له‌م به‌رهه‌مه‌دا ( كۆسار فه‌تاح _ سه‌نتور ، ئه‌فشین جه‌مال _ كه‌مانچه‌ ، گۆڤه‌ند عه‌بدوڵڵا _ عود ، نزار زێوێی _ تار ).

هاوكات شادمان محه‌مه‌د ده‌رهێنه‌ر ستافی كاری كلیپی به‌رهه‌مه‌كه‌ی به‌م شێوه‌یه‌ بۆ خوێنه‌رانی PUKmedia ناساند، ئه‌م به‌رهه‌مه‌ له‌لایه‌ن خاك تیڤی كلیپی بۆ كراوه‌و ده‌رهێنانی شادمان محه‌مه‌د و مۆنتاژی هه‌رێم نوری و كامێرا سیروان كه‌ریم و روناكی حه‌مه‌ واحید و ماكیاژ رێژین لوقمان، هاوكات له‌ناو یه‌كێك له‌ ستۆدیۆكانی خاك تیڤی وێنه‌ی گیراوه‌.

PUKmedia هاژه‌ باست