كونسوڵی ئه‌مریكا چوونی وه‌فدی یه‌كێتی بۆ به‌غدا به‌رز ده‌نرخێنێت

.

پاشنیوه‌ڕۆی ئه‌مرۆ 13-6-2018 مه‌لا به‌ختیار لێپرسراوی ده‌سته‌ی كارگێڕی مه‌كته‌بی سیاسی یه‌كێتی له‌ باره‌گای مه‌كته‌بی سیاسی له‌ سلێمانی، پێشوازیكرد له‌ كین گرۆس كونسوڵی گشتی ئه‌مریكا له‌ هه‌رێم‌ و وه‌فدێكی یاوه‌ری.

له‌ دیدارێكدا، مه‌لا به‌ختیار بارودۆخی كوردستان ‌و عیراق ‌و هه‌ڵبژاردن ‌و هه‌وڵه‌كان بۆ پێكهێنانی حكومه‌تێكی نیشتمانی ته‌وافقی‌ و سیاسه‌تی لایه‌نه‌كان ‌و گرنگی چاره‌سه‌ركردنی كێشه‌كانی له‌ روانگه‌ی سیاسه‌تی یه‌كێتیی نیشتمانیی كوردستانه‌وه‌ بۆ كونسوڵی ئه‌مریكا روونكرده‌وه‌.

راشیگه‌یاند: لامان گرنگه‌، كورد به‌شێك بێت له‌ چاره‌سه‌ری كێشه‌كانی عیراق، له‌سه‌ر بنه‌مای رێسای هه‌ڵبژاردن ‌و ده‌ستورو یاسا‌و دوا بڕیاره‌كانی دادگای ده‌ستووری.

روونیشكرده‌وه‌، بۆ پێكهێنانی حكومه‌تی نوێ‌، له‌گه‌ڵ حكومه‌تێكین پێكهاته‌كه‌ی فراوانی ئاسۆیی بێت ‌و بۆ هه‌موو لایه‌نه‌ سیاسیه‌كان‌ و پێكهاته‌كانی عیراق بێت، نه‌ك حكومه‌تێكی ستوونی ‌و مه‌ركه‌زی ‌و تایه‌فه‌گه‌ری.

لێپرسراوی ده‌سته‌ی كارگێڕی جه‌ختیشیكرده‌وه‌، كورد هه‌قی خۆیه‌تی ئیستحقاقی هه‌ڵبژاردن‌ و ده‌ستوری خۆی ده‌سته‌به‌ر بكات. ئه‌مه‌یش نایه‌ته‌دی، به‌بێ‌ به‌شداری راسته‌قینه‌ له‌ حكومه‌ت ‌و جومگه‌ سه‌ره‌كیه‌كان.

مه‌لا به‌ختیار دووپاتیشیكرده‌وه‌، وه‌ك یه‌كێتی هه‌میشه‌ له‌گه‌ڵ یه‌كڕیزی لایه‌نه‌ سیاسییه‌كانی كوردستانین، چوونی كورد به‌ یه‌كگرتوویی بۆ دانوستان له‌ به‌غدا به‌تایبه‌تی یه‌كێتی ‌و پارتی به‌ گرنگ ده‌زانین.

كونسوڵی گشتی ئه‌مریكا له‌گه‌ڵ به‌شی زۆری بۆچوونه‌كانی لێپرسراوی ده‌سته‌ی كارگێڕو سیاسه‌تی یه‌كێتی هاوڕابوو. ئاماژه‌ی به‌وه‌دا كه‌ كورد به‌ یه‌كگرتوویی بچێته‌ به‌غدا بۆ دانوستان، به‌تایبه‌تی یه‌كێتی ‌و پارتی. له‌ سه‌ره‌تاوه‌ تا كۆتایی له‌ناو پرۆسه‌ی پێكهێنانی حكومه‌ت بن.

هه‌روه‌ها كونسوڵی ئه‌مریكا ستایشی چوونی وه‌فدی یه‌كێتی بۆ به‌غدا كرد، هه‌روه‌ها ده‌ستپێشخه‌ری چوون بۆ به‌غدا به‌ یه‌كگرتوویی ‌و گفتوگۆ له‌گه‌ڵ لایه‌نه‌ سیاسییه‌كانی عیراق به‌گرنگ زانی.

داواشیكرد، یه‌كێتی له‌ هه‌وڵه‌كانی به‌رده‌وامبێت بۆ هێنانه‌دی یه‌كریزی لایه‌نه‌ كوردستانییه‌كان ‌و چاره‌سه‌ركردنی كێشه‌كان، هه‌تا حكومه‌تێكی نیشتمانی فراوان پێكدێت.

PUKmedia تایبه‌ت