لیژنه‌ی داكۆكی له‌ئازادی رۆژنامه‌نووسی: بكوژانی رۆژنامه‌نووسه‌كه‌ بدۆزرێنه‌وه‌

.

له‌ راگه‌یه‌نراوێكدا كه‌ كۆپییه‌كی بۆ PUKmedia نێردراوه‌، لیژنه‌ی داكۆكی له‌ ئازادی رۆژنامه‌نووسی و مافی رۆژنامه‌نووسان له‌ كوردستان ئیدانه‌ی تیرۆركردنی رۆژنامه‌نووسه‌كه‌ی دهۆك ده‌كه‌ن، كه‌ ئه‌مه‌ی خواره‌وه‌ ده‌قه‌كه‌یه‌تی:

له‌كاتێكدا رۆژنامه‌نووسان له‌ به‌رامبه‌ر تیرۆرستانی داعش له‌ به‌ره‌كانی شه‌ڕ هه‌واڵ ده‌گوازنه‌وه‌و توشی چه‌ندین ئاسته‌نگ ده‌بنه‌وه‌. مخابن رۆژی 13-8-2016 هه‌واڵی تیرۆركردنی رۆژنامه‌نووس "وداد حسێن عومه‌ر" ناسراو به‌ "وداد دهۆكی" كه‌ له‌ تۆڕی هه‌واڵی رۆژ نیوز كاری ده‌كرد له‌ شاری دهۆك، له‌كاتێكدا هه‌واڵی تیرۆركردنی ئه‌و رۆژنامه‌نووسه‌مان بیست دیسان برینی زامی بنه‌ماڵه‌كانی رۆژنامه‌نووسانی ده‌ستی تیرۆر ده‌كولێنێته‌وه‌. له‌هه‌مانكاتیشدا پێشێلكارییه‌كی راسته‌وخۆی مافی رۆژنامه‌نووسان و ئازادی رۆژنامه‌نووسییه‌ له‌كوردستاندا.

ئێمه‌ له‌ لیژنه‌ی داكۆكی له‌ مافی رۆژنامه‌نووسان و ئازادی رۆژنامه‌نووسی له‌ ئه‌نجومه‌نی سه‌ندیكای روژنامه‌نووسانی كوردستان ، داوا له‌ حكومه‌تی هه‌رێمی كوردستان و وه‌زاره‌تی ناوخۆو ده‌زگای ئاسایشی هه‌رێم و پۆلیس ده‌كه‌ین، تاوانباران بدۆزنه‌وه‌و ته‌سلیم به‌دادگای بكه‌ن.

ئێمه‌ پێشترو ئێستاو سبه‌ی، هه‌ر داكۆكیكاری سه‌رسه‌ختی پێشێلكارین دژی رۆژنامه‌نووسانی كوردستان، ئه‌ندامی سه‌ندیكا بێت یاخود نا.

درود بۆ گیانی به‌رزه‌فڕی رۆژنامه‌نووسانی شه‌هید...

ئه‌نجومه‌نی سه‌ندیكای رۆژنامه‌نووسانی كوردستان
لیژنه‌ی داكۆكی له‌ ئازادی رۆژنامه‌نووسی و مافی رۆژنامه‌نووسان له‌ كوردستان
هه‌ولێر 13-8-2016

PUKmedia  تایبه‌ت