سزای دوو ساڵ بەندكردن بەسەر پەرلەمانتار حەسەن ئەلخەفاجیدا سەپێندرا

PUKMEDIA

لۆگۆی دەستەی دەستپاكی عیراق

دەستەی دەستپاكی عیراق رایگەیاند: دادگا سزای دوو ساڵ بەندكردنی بەسەر حەسەن ئەلخەفاجی، ئەندامی ئەنجومەنی نوێنەراندا سەپاندووە، بەهۆی تێوەگلانیی لە كەیسێكی سەرانەسەندنی 500 هەزار دۆلاری و داواكردنی پشك لەپڕۆژەیەكی نیشتەجێبوون.

دەستەی دەستپاكی عیراق، ئەمڕۆ پێنج شەممە 23ی 7ی 2026، لەبەیاننامەیەكدا رایگەیاند: دادگای تایبەت بە تاوانەكانی بەرەنگاربوونەوەی گەندەڵی سزای بەسەر حەسەن ئەلخەفاجی، ئەندامی ئەنجومەنی نوێنەرانی عیراقدا سەپاند، بەهۆی ئەوەی هەستاوە بەسزادان و سەرانەسەندن لەسكاڵاكار (مستەفا فەعل مشتت)، و داوای بڕی 500 هەزار دۆلاری لێكردووە.

ئاماژەی بەوەشكرد: ناوبراو داوای تۆماركردنی رێژەی 40% ی پڕۆژەی نیشتەجێبوونی حەورائی بەغدادی كردووە بۆ بەرژەوەندیی خۆی بەناوی یەكێك لەكارمەندانی نووسینگەكەی، لەبەرامبەر بەڵێنی دەستوەردان لەڕێكارەكانی پەیوەندیدار بە كاری ئەنجومەنی باڵای دادوەری و دەستەی دەستپاكی فیدراڵی بۆ داخستنی كەیسی هەڵئاوسانی سەرمایەو هەڵگرتنی دەستبەسەرداگرتن لەسەر سامانی سكاڵاكارەكە، جگە لەدەستوەردان لەلای دەستەی وەبەرهێنانی بەغداد بۆ دەستپێكردنەوەی كاركردن لەپڕۆژەی نیشتەجێبوونی جەوهەرەی بەغداد، بێ ئەوەی هیچ سیفەت و دەسەڵاتێكی یاسایی هەبێت.

دەستەكە روونیشی كردوەتەوە: دادگا پشتی بە كۆمەڵێك بەڵگە بەستووە، لەوانە، دانپێدانانی تۆمەتباری دووەم (ئەنوەر سەباح عەبد سادق)، كۆنووسی تۆمارە دەنگییەكان، وتەی شایەتحاڵەكان، و وێنەیەك لە گرێبەستە ئیمزاكراوەكە.

ئەوەشی خستەڕوو: پاش پێداچوونەوە بە بەڵگەكان، دادگا بەپێی ئەحكامەكانی ماددەی (452/1) لە یاسای سزادانی عیراقی، بڕیاری بەندكردنی بۆ ماوەی دوو ساڵ بەسەر حەسەن ئەلخەفاجی، ئەندامی ئەنجومەنی نوێنەرانی عیراقدا سەپاند.

PUKMEDIA