له‌سه‌ر پۆستی فه‌یسبووك، هه‌ڕه‌شه‌ له‌ پێشمه‌رگه‌یه‌كی یه‌كێتی ده‌كرێت

.

چه‌ند شه‌وێك پێش ئێستا ژماره‌یه‌ك پێشمه‌رگه‌ی سه‌ر به‌ پارتی دیموكراتی كوردستان، له‌ كافتریایه‌ك له‌ ناحیه‌ی داره‌توو پێشمه‌رگه‌یه‌كی یه‌كێتیی نیشتمانیی كوردستان ده‌ڕفێنن و هه‌ڕه‌شه‌ی لێده‌كه‌ن.

له‌وباره‌یه‌وه‌، سه‌رچاوه‌یه‌كی ئاگادار له‌ كۆمیته‌ی داره‌تووی یه‌كێتیی نیشتمانیی كوردستان تایبه‌ت به‌ PUKmedia ی راگه‌یاند: شه‌وی 12-12-2016 ژماره‌یه‌ك پێشمه‌رگه‌ی سه‌ر به‌ پارتی هه‌ڵیان كوتاوه‌ته‌ سه‌ر كافتریایه‌كی ناحیه‌ی داره‌توو، له‌وێ پێشمه‌رگه‌یه‌كیان رفاندووه‌ به‌ناوی (س.ش) كه‌ سه‌ر به‌ لیوای 10ی وه‌زاره‌تی پێشمه‌رگه‌یه‌.

سه‌باره‌ت به‌ هۆكاری رفاندنه‌كه‌ی، ئه‌و سه‌رچاوه‌یه‌ وتی: له‌سه‌ر ئه‌و پۆستانه‌ بووه‌ كه‌ ئه‌و پێشمه‌رگه‌یه‌ی یه‌كێتی له‌ تۆڕی كۆمه‌ڵایه‌تی فه‌یسبوك نووسیونی و پێیان وتووه‌ ده‌بێت ئه‌و پۆستانه‌ی له‌سه‌ر پارتی كردووته‌ بیانسڕیته‌وه‌و له‌مه‌ولا پۆست دژی یه‌كێتی بكه‌یت. راشیگه‌یاند: هه‌ڕه‌شه‌ی ئه‌وه‌ش له‌و پێشمه‌رگه‌یه‌ كراوه‌، كه‌ ئه‌گه‌ر له‌مه‌ولا به‌وجۆره‌ پۆست نه‌كات و قسه‌ به‌ یه‌كێتی نه‌ڵێت، ئه‌وا سزای توندی ده‌ده‌ن و كێشه‌ی بۆ دروست ده‌كه‌ن.

ئه‌و سه‌رچاوه‌یه‌ ئاماژه‌ی به‌وه‌ش كرد، ئه‌و پێشمه‌رگه‌یه‌ له‌كاتی رفاندنیدا سزادراوه‌. به‌ڵام له‌ ئێستادا له‌لایه‌ن براو خزمه‌كانییه‌وه‌ ئازادكراوه‌، چونكه‌ دوو برای و چه‌ند خزمێكیان پارتین، له‌هه‌مانكاتدا ئه‌و پێشمه‌رگانه‌شی كه‌ ئه‌میان ده‌ستگیر كردووه‌، له‌هه‌مان لیوای 10ی وه‌زاره‌تی پێشمه‌رگه‌ن و خزمی یه‌كترین.

له‌ كۆتاییدا رایگه‌یاند: له‌ ئێستادا داوامان له‌ مه‌ڵبه‌ندی یه‌كێتی له‌ ناوچه‌كه‌مان كردووه‌ لێكۆڵینه‌وه‌ له‌وباره‌یه‌وه‌ بكه‌ن، هه‌روه‌ها پێشمه‌رگه‌كه‌ش سكاڵای یاسایی تۆماربكات بۆ ئه‌وه‌ی به‌ڕه‌سمی لێپرسینه‌وه‌ له‌و رووداوه‌ بكرێت.

PUKmedia تایبه‌ت