پارێزگاری كه‌ركوك: جه‌ختده‌كه‌ینه‌وه‌ له‌ گه‌ڕاندنه‌وه‌ی ئاواره‌كان

.

پارێزگاری كه‌ركوك له‌گه‌ڵ (ساڵح ئه‌لموتڵه‌گ) دا باسی شایسته‌ داراییه‌كانی جوتیارانی كه‌ركوك و كێشه‌ی ئاواره‌كان ده‌كات
 
ئه‌مڕۆ 9-2-2016 د. نه‌جمه‌دین كه‌ریم پارێزگاری كه‌ركوك له‌نوسینگه‌ی تایبه‌تی خۆی پێشوازی كرد له‌ ساڵح ئه‌لموتڵه‌گ سه‌رۆكی لیستی (العربیه‌) و چه‌ند ئه‌ندامێكی ئه‌نجومه‌نی نوێنه‌ران و له‌ دانیشتنیكدا باسی بارودۆخی سیاسی و ئابوری و ئه‌منی و شایسته‌ داراییه‌كانی جوتیارانی كه‌ركوك بۆ ساڵانی 2014-2015 و كێشه‌ی ئاواره‌كان خرانه‌ به‌ر باس .
 
له‌ كۆبونه‌وه‌كه‌دا جه‌خت كرایه‌وه‌ له‌پێویستی گه‌ڕانه‌وه‌ی ئاواره‌كان بۆ زێدی خۆیان و ستایشی هه‌وڵ و كاره‌كانی ئیداره‌ی كه‌ركوك و فه‌رمانگه‌كانی‌ و دانیشتوانه‌كه‌ی كرا بۆ ئه‌و هه‌ڵوێسته‌ی نواندیان به‌رامبه‌ر برا ئاواره‌كانیان و كه‌م كردنه‌وه‌ی ئازاره‌كانیان له‌ كاتێكدا شایسته‌ داراییه‌كانی كه‌ركوك سه‌رف نه‌كراوه‌ و قه‌یرانی ئابوری ته‌نگی به‌ وڵات هه‌ڵچنیوه‌.

له‌لێدوانێكیشدا بۆ میدیاكاران ساڵح ئه‌لموتڵه‌گ وتی: شاری كه‌ركوك پێشوازی كردوه‌ له‌ زیاتر له‌ 113 هه‌زار خێزانی ئاواره‌ و سه‌ره‌ڕای ئه‌و ته‌گه‌رانه‌ی هاتونه‌ته‌ پێش شاره‌كه‌ هه‌موو توانایان خستۆته‌ گه‌ڕ بۆ پێشكه‌ش كردنی خزمه‌تگوزاری و هاوكاری بۆیان و وتیشی دڵنیاین له‌وه‌ی له‌ داهاتودا هاوكاری باشی ئاواره‌كان ده‌كرێت له‌به‌ر ڕۆشنایی ئیداره‌ی سه‌ركه‌وتوانه‌ی شاری كه‌ركوك و هه‌وڵه‌كانی وه‌زاره‌تی كۆچ و كۆچبه‌ران و ڕێكخراوه‌كان ولیژنه‌ی ئاواره‌كان له‌ ئه‌نجومه‌نی نوێنه‌ران دا.
 
لای خۆیه‌وه‌ د. نه‌جمه‌دین كه‌ریم وتی، سه‌ردانی د. (ساڵح ئه‌لموتڵه‌گ) و په‌رله‌مانتاران بۆ شاری كه‌ركوك سه‌ركه‌وتوو بو و چه‌ندین بابه‌ت به‌ وردی تاووتوێكران به‌ تایبه‌تی كێشه‌ی ئاواره‌كان و ته‌ئكید كرایه‌وه‌ له‌سه‌ر پێویستی گه‌ڕانه‌وه‌یان بۆ ناوچه‌ ئازاد كراوه‌كانیان وێڕای بابه‌تی شایسته‌ داراییه‌كانی جوتیارانی كه‌ركوك

PUKmedia تایبه‌ت