یه‌كێتی مامۆستایانی كوردستان هۆشداریی ده‌داته‌ حكومه‌ت

یه‌كێتی مامۆستایانی كوردستان

ئه‌نجومه‌نی ته‌نفیزی یه‌كێتی مامۆستایانی كوردستان راگه‌یه‌ندراوێك له‌باره‌ی دواكه‌وتنی مووچه‌ بڵاوده‌كاته‌وه‌و رایده‌گه‌یه‌نێت، له‌وه‌ زیاتر ناتوانين دان به‌ خۆدا بگرین .

ده‌قی نوسراوه‌كه‌....

رۆژی پێنجشه‌ممه‌  رێككه‌وتی 27/8/2015 ئه‌نجومه‌نی نه‌نفیزی (ی.م.ك) له‌ سیانزه‌مین كۆبوونه‌وه‌ی خۆیدا هه‌ڵوێسته‌ی له‌سه‌ر كۆمه‌ڵێك بابه‌تی رێكخراوه‌یی و په‌روه‌رده‌یی گرنگ كرد، بڕیار و راسپارده‌ی پێویستیان له‌باره‌یه‌وه‌ درا، هاوزه‌مان له‌ به‌شێكی كۆبوونه‌وه‌كه‌دا پرسی دووباره‌ و سێباره‌بوونه‌وه‌ی دواكه‌وتنی مووچه‌ خرایه‌ به‌رباس و گفتوگۆ، ئه‌ندامانی ئه‌نجومه‌ن جه‌ختیان كرده‌وه‌ له‌سه‌ر ئه‌وه‌ی له‌سه‌ره‌تای ساڵی (2014)ه‌وه‌ روبه‌ڕوی ئه‌و كێشه‌یه‌ بوونه‌ته‌وه‌ به‌ له‌به‌رچاوگرتنی دۆخه‌كه‌ به‌گشتی و دڵسۆزی یه‌كێتی مامۆستایان بۆ پرۆسه‌یه‌كی په‌روه‌رده‌یی ته‌ندروست  به‌ ئه‌وپه‌ڕی له‌خۆبوردنه‌وه‌ مامه‌ڵه‌یان له‌گه‌ڵدا كردووه‌ وێڕای ره‌خنه‌ی توند لێره‌ و له‌وێ، به‌ڵام به‌راستی مانگی رابردوو كه‌ (48) رۆژ تێپه‌ڕیكرد به‌ ته‌واوه‌یه‌تی (ی.م) ی نیگه‌ران كردو گه‌یشته‌ ئه‌و بڕوایه‌ی له‌لایه‌ك پرۆسه‌ی په‌روه‌رده‌ خه‌می لێناخورێت، له‌لایه‌كیتر هه‌ر كارێك بته‌وێت له‌م هه‌رێمه‌ بكرێت ده‌بێت به‌ فشار بێت، له‌كاتێكدا پێویسته‌ و ده‌بێت ئه‌وله‌ویه‌تی حكومه‌ت په‌روه‌رده‌ و فێركردن بێت، چونكه‌ هه‌ر جومگه‌یه‌كی تر كۆسپ و له‌مپه‌ری بێته‌ پێش قابیلی چاره‌سه‌ر و قه‌ره‌بووكردنه‌وه‌یه‌، به‌ڵام په‌روه‌رده‌ بنه‌مای هه‌ره‌ بنه‌ڕه‌تی  كۆمه‌ڵگه‌یه‌، خاو به‌ڕێوه‌چونی یان قه‌یراناوی بوونی به‌ واتا قه‌یراناوی بوونی كۆی كۆمه‌ڵگه‌یه‌ تا زه‌مه‌نێكی دوور، ره‌نگه‌ قه‌ره‌بوشی نه‌كرێته‌وه‌، ئه‌نجومه‌نی ته‌نفیزی به‌ پێداگیره‌وه‌ داواكاره‌ پرسی موچه‌و پرسه‌كانی تر ئاوڕی جددی لێبدرێته‌وه‌و له‌ ژێر هه‌ر پاساوێكدا بێت  دوانه‌خرێت و نه‌كرێته‌ قوربانی ململانێ نێوان وه‌زاره‌تی سامانه‌ سروشتیه‌كان و دارایی و مه‌سه‌له‌ سیاسیه‌كان، به‌پێچه‌وانه‌وه‌ ئه‌نجومه‌نی ته‌نفیزی هه‌موو رێگایه‌ك ده‌گرێته‌به‌ر بۆ به‌ده‌ستهێنانی مافه‌كانی مامۆستایان، چونكه‌ له‌وه‌ زیاتر ناتوانن دان به‌ خۆدا بگرن و ده‌ست و په‌نجه‌ نه‌رم بكه‌ن، بۆ ئه‌و مه‌به‌سته‌ ده‌بێت :-
1- خشته‌ی پێدانی موچه‌ رابگه‌ێنرێت نه‌ك هه‌ر رۆژه‌ و وه‌زاره‌تێك، سه‌ره‌نجام هه‌موو له‌چاوه‌ڕوانیدابن .
2- موچه‌ی هه‌ردوو وه‌زاره‌تی په‌روه‌رده‌ و خوێندنی باڵا دوای وه‌زاره‌تی پێشمه‌رگه‌ و ئه‌و هێزانه‌ی پارێزگاری له‌ سه‌روه‌ری و خاكی نیشتمان ده‌كه‌ن، دابه‌شبكرێت . 

یه‌كێتی مامۆستایانی كوردستان
  ئه‌نجومه‌نی ته‌نفیزی
   1/9/2015