ئەی دیموكراسی

.

ئەی دیموكراسی

د.شیركۆ عبدالله‌‌

قەزات لە ماڵم ئەی دیموكراسی
ئەشهەدوبیللا سیستمێ خاسی
عادیل، حەققانی، بێ موجامەلە
عەیب داپۆشی وەكو لیباسی
بێ غەل و غەش و راست و رەوانیت
مام و برازاو زاوا ناناسی
هیچ كەس ناتوانێ تۆ ماڵی بكات
پێشبینی ناكرێی عەینەن كەشناسی
خوا مەحفوزت كاو رەببی بەدوور بی
لە چاوی پیس و هی ئەلخەناسی
با فشە نەكەن، بە كەس ناگیرێی
زۆر لووس و خزی بە چەشنی ماسی
بۆ گشت میللەتێك ئاشناو ناسراویت
مەسەلەن بۆ كورد جاف و بڵباسی
بۆ هاوین سەهۆڵ، بۆ زستان شێلم
بۆ بەهارانیش چوالەو رێواسی
ماشەڵڵات لێ بێ، بۆ هەمووی ئەبیت
هەم بۆ جمهوری، هەم بۆ ویراسی