PUKmedia ماڵپەری وەرزشی

دیە ئاواتی ئەوە دەخوازێت خۆی لە هەڵبژاردەی عیراقدا ببینێتەوە


5/4/2021 13:48:00
چاپ کردن
بە وێنەوە    بە بێ وێنە
           
.




ئەوین عەبدولهادی

دیە تەحسین حسێن ساڵی 2006 لە سلێمانی لەدایكبووە، لەو تەمەنە كورتەیدا ئێستا كچە یاریزانێكی لێهاتووی كاراتێیەو لە یانەی سلێمانی لە یارییكردن بەردەوامە، سەرەتا بەیاریی جومناستیك دەستیپێكردووە، بۆ ماوەیەك لەو یارییە بەردەوام بووە.

دواتر واز لەیاریی جومناستیك دەهێنێت و رو دەكاتە یاریی كاراتێ، هەردوو راهێنەر هێرش مستەفا و هێنەر عومەر دەستیان گرتووەو بەو یارییەیان ئاشنا كردووە، تائێستاش لەم یارییەدا بەردەوامە و لەسەردەستی هەردووكیان لە یانەی سلێمانی هەنگاو بەروە پێش دەنێت.

دییە لەلێدوانێكیدا بۆ ستادیۆمی كوردستانی نوێ باسی ئەوەی كرد كە خێزانەكەی هاندەری ئەو بوون و لەتەمەنی 7 ساڵییەوە بەپاڵپشتی ئەوان بەجیهانی وەرزش ئاشنا بووە، رۆژ بەرۆژیش لە هەوڵ و كۆششی بەردامدایە تا بگاتە لووتكەی ئاستی هونەری.

سەبارەت بەیەكەمین پاڵەوانێتییش كەبەشداریی تیادا كردووە، ووتی؛ رۆژی 24/2/2017 بەشداریی پاڵەوانێتیی كاراتێی (مام) م كردووە و لەكێشی خۆمدا و لە پشتێنی خۆمدا یەكەم بووم، دواتر لە چەندین پاڵەوانێتیی تریشدا بەشداریم كردووەو چەندین جام و میدالی یەكەمیم بردۆتەوە .

ئەو زیاتر دواو ووتی: ئێستا خاوەنی پشتێنی رەشی دان دووم، لەبەر پەتای كۆرۆنا ماوەیەكە بەشداریی هیچ پاڵەوانێتییەكم نەكردووە، پێش بڵاو بوونەوەی پەتای كۆرۆنا بۆ پاڵەوانێتییەكی كاراتێ لە ئەرمینیا داوەت كراوم، بەڵام لەبەر ئەوەی منداڵترین یاریزانی وەفدی كوردستان بووم و تەمەنم تەنیا 18 ساڵ بوو رێگەش نەدرا كەسێكی لەگەڵمدا بێت بۆ پاڵەوانێتییەكە، بڕیارمدا بەشداریی نەكەم.

لەدوا قسەیدا بۆ ستادیۆم ووتی: هیوادارم ئاستی هونەریم بگاتە ئاستێك كە خۆم لە هەڵبژاردەی عیراقدا ببینمەوە، هیوایەكی تریشم ئەوەیە كچانیش خو بدەنە وەرزش و خێزانەكانیان رێگرییان لێنەكەن و وزەو توانای خۆیان تاقی بكەنەوە.

له‌ ستادیۆمه‌وه‌

ڤیدیۆ