كۆمسیۆن: هیچ داواكارییەكیمان بۆ كشانەوە لەهەڵبژاردن پێنەگەیشتوە

.

كۆمسیۆنی باڵای سەربەخۆی هەڵبژاردنەكان رایگەیاند: تا ئێستا هیچ داواكارییەكییان بۆ كشانەوە لەهەڵبژاردنەكان پێنگەیشتوەو ئاماژەشی بەوەداوە كە دوای 3 مانگ كۆتایی بەهەڵمەتی بانگەشە دێت.

لەو بارەیەوە نبراس ئەبو سۆدە، یاریدەدەری وتەبێژی راگەیاندنی كۆمسیۆنی باڵای سەربەخۆی هەڵبژاردنەكان، تایبەت بە PUKmedia رایگەیاند: هەڵمەتی بانگەشەی هەڵبژاردن بۆ كاندیدەكان لەرۆژی 8ی ئەم مانگەوە دەستیپێكردوەو تا 8ی تشرینی یەكەم دەخایەنێت و هەڵمەتەكە 3 مانگ بەردەوام دەبێت، بەپێچەوانەی هەڵمەتەكانی پێشوو كە تەنها یەك مانگی دەخایاند.

راشیگەیاند: كۆمسیۆن لیژنەی بۆ چاودێری و بەدواداچوون پێكهێناوەو هەرچی پێشێلكارییەك لەمیانی هەڵمەتی بانگەشەدا رووبدات، بە سكاڵا پێیدەگات، ئەو سكاڵایانەشی جددی بێت و بەڵگەی لەگەڵدا بێت، كۆمسیۆن لێكۆڵینەوەی لەبارەیانەوە دەكات و سەیریان دەكات.

دووپاتیشیكردەوە: تا ئێستا هیچ داواكارییەكی كشانەوە نەگەیشتۆتە لای كۆمسیۆن، لە 13 بۆ 20 حوزەیرانی رابردوو دەرگایان بۆ پێشكەشكردنی داواكاری كشانەوە كردبوەوە، لەدوای ئەو وادەیەشەوە، كۆمسیۆن هیچ داواكارییەكی بۆ كشانەوە لەهەڵبژاردنەكان پێنەگەیشتووە.

روونیشیكردەوە: ئێستا كۆمسیۆن هیچ داواكارییەكی لەبارەی كشانەوە پێنگەیشتووە، نە لەلایەن كاندیدە تاكەكانەوە، نە لەلایەن هاوپەیمانی و پارتەكانەوە، خۆ ئەگەر پێشی بگات، داواكارییەكە دەخرێتە بەردەم ئەنجومەنی كۆمسیاران تا لەبارەیەوە بڕیار لەسەری بدات.

جەختیشیكردەوە: هیچ كادرێكی كۆمسیۆن دەستی لەكار نەكێشاوەتەوەو هەموان پابەندن بە كاتەكان بۆ بەڕێوەچوونی هەڵبژاردنەكان لەوادەی خۆی لە 10ی تشرینی یەكەمی 2021.

PUKmedia تایبەت